Reksetin tab. 20mg №30

Tavsif

Ushbu ilova-varaqada quyidagi ma'lumotlar saqlanadi:
1. Reksetin preparati o‘zi nima va u nima uchun qo‘llaniladi
2. Reksetinni qabul qilishdan avval nimalarni bilishingiz kerak
3. Reksetin preparatini qanday qabul qilinadi
4. Bo‘lishi mumkin bo‘lgan nojo‘ya samaralari
5. Saqlash sharoiti va yaroqlilik muddati
6. O‘rami va boshqa ma'lumotlar.
1. Reksetin preparati o‘zi nima va u nima uchun qo‘llaniladi
Reksetin quyidagi havotirli buzilishlarni davolashda qo‘llaniladi: obsessiv-kompulsiv buzilish (miyaga o‘rnashib qolgan fikrlar va kompulsiv harakatlar), vahimali buzilishlar (sarosimalik xurujlari, shu jumladan agorafobiya, ya'ni jamoat joylarida paydo bo‘lishdan qo‘rqish), ijtimoiy havotirli buzilish (ijtimoiy vaziyatlardan qo‘rqish yoki ulardan bosh tortish), jarohatdan keyingi stress holati (jarohatli vaziyat natijasida vujudga kelgan havotirlik) va tarqalgan havotirli buzilish (haddan tashqari havotirlik va asabiylik).
Reksetin serotoninni qayta qamrab olinishining selektiv ingibitorlari (SQQOSI) guruhiga mansub. Serotonin har bir odamning bosh miyasida mavjud. Depressiya yoki havotirli buzilishi bo‘lgan odamlarda serotoninning miqdori kamaygan bo‘ladi. Ayni vaqtda Reksetin va boshqa SQQOSI qanday tarzda ta'sir ko‘rsatishi to‘liq ma'lum emas, biroq ular ushbu holatlarda bosh miyada serotonin miqdorini oshirgan holda yordam berishi mumkin. O‘zingizni yaxshi his qilishingiz uchun depressiya va havotirli buzilishni to‘g‘ri davolash muhim.
2. Reksetinni qabul qilishdan avval nimalarni bilish kerak
Quyidagi vaziyatlarda Reksitinni qabul qilmang:
- Agar Sizda paroksetin yoki preparatning boshqa har qanday komponentiga allergiya bo‘lsa (6-bo‘limda sanab o‘tilgan).
- Agar monoaminoksilaza ingibitorlari deb nomlanadigan (MAOI masalan, moklobemid yoki linezolid antibiotiki), yoki metiltioniniy xloridi (metilen ko‘ki) preparatlarni qabul qilayotgan bo‘lsangiz yoki oxirgi ikki hafta davomida ularni qabul qilgan bo‘lsangiz. Agar serotonin sindromi rivojlanishi yuzasidan sinchkovlik bilan nazorat qilish imkoni bo‘lsa va va arterial qon bosimi monitoring qilinsa, ayrim vaziyatlarda linezolidni paroksetin bilan birga qabul qilish mumkin. Davolovchi shifokoringiz MAOI qabul qilinishi tugaganidan so‘ng Reksetinni qabul qilishni qachon boshlash mumkinligini aytadi.
- Agar Siz tioridazin yoki pimozid antipsixotik preparatlarini qabul qilayotgan bo‘lsangiz (ruhiy buzilishlarni davolash uchun qo‘llaniladi).
Agar quyida sanab o‘tilganlardan birontasi Sizga taalluqli bo‘lsa, Reksetinni qabul qilishni boshlashdan avval bu haqida davolovchi shifokoringizga xabar bering.
Ogohlantirishlar va ehtiyotkorlik choralari
Reksetin preparatini qabul qilishni boshlashdan avval shifokor yoki farmatsevt bilan maslahatlashing:
- Agar Siz 18 yoshga to‘lmagan bo‘lsangiz (“Bolalar va 18 yoshdan kichik o‘smirlar” bo‘limiga qarang.)
- Agar Sizda qachonlardir maniakal holatlari bo‘lgan bo‘lsa (giperfaol xulq)
- Agar Sizda buyrak, jigar yoki yurak bilan bog‘liq muammolar bo‘lsa
- Agar Sizda qandli diabet kasalligi bo‘lsa
- Agar Siz tutqanoq bilan xastalangan bo‘lsangiz yoki Sizda qachonlardir tirishish huruji yuz bergan bo‘lsa
- Agar Sizda glaukoma bo‘lsa (ko‘zning yuqori ichki bosimi)
- Agar Sizda gematomalar oson paydo bo‘lsa yoki yuqori qon ketishlari kuzatilsa, yoki Siz qon ketishi vaqtini uzaytirishi mumkin preparatlarni qabul qilayotgan bo‘lsangiz (bunday holatlarda qonni to‘xtatish qiyin), masalan, varfarin, atsetilsalitsil kislotasi yoki ibuprofen.
- Agar Siz homilador bo‘lsangiz yoki homiladorlikka gumon bo‘lsa, yoki emizayotgan bo‘lsangiz (“Homiladorlik, emizish davri va fertillik” bo‘limini qarang).
- Agar Siz boshqa antidepressant qabul qilayotgan bo‘lsangiz
- Agar Sizda shizofreniya bo‘lsa va shu munosabat bilan boshqa dori preparatlarini qabul qilayotgan bo‘lsangiz.
- Agar Siz sut bezi rakini yoki bepushtlikni davolash uchun tamoksifen qabul qilayotgan bo‘lsangiz
- Agar Siz elektrotirishish davolashni (ETT) o‘tayotgan bo‘lsangiz.
Agar Siz 65 yoshdan katta bo‘lsangiz va jigar bilan bog‘liq muammolar bo‘lsa, quyidagi sabablarga ko‘ra preparatni alohida ehtiyotkorlik bilan qabul qilish kerak:
- Juda kam hollarda Reksetin qon zardobida natriy miqdorini kamaytiradi, bu ongni chalkashishi va mushak zaifligiga olib kelishi mumkin. Agar Siz jigar sirrozi bilan xastalangan bo‘lsangiz va/yoki qon zardobida natriy miqdorini kamaytirishi mumkin bo‘lgan preparatlarni qabul qilayotgan bo‘lsangiz, buning ehtimoli oshadi. Giponatriyemiyaga xarakterli bo‘lgan bunday simptomlar paydo bo‘lganda, imkoniyat boricha tibbiy yordamga murojaat qiling.
O‘z joniga qasd qilish to‘g‘risida fikrlar va depressiya yoki havotirlikni kuchayishi
Agar Sizda depressiya va/yoki havotirli buzilish bo‘lsa, Sizda o‘zingizga-o‘zingiz shikast yetkazish yoki o‘zingizning joningizga qasd qilish to‘g‘risida fikrlar paydo bo‘lishi mumkin. Siz antidepressantlarni qabul qilishni boshlaganingizda, bunday fikrlar yanada kuchayishi mumkin, chunki dori vositasi darhol ta'sir ko‘rsatmaydi, uning yaqqol ta'siri odatda ikki haftadan so‘ng, ba'zida undan kech namoyon bo‘ladi.
Bunday fikrlar quyidagi vaziyatlarda ko‘proq paydo bo‘ladi:
- agar avval o‘z joningizga qasd qilish yoki o‘zingizga-o‘zingiz shikast yetkazish to‘g‘risida fikrlar paydo bo‘lgan bo‘lsa.
- yoshlikda.
Klinika tadqiqotlari natijalariga ko‘ra, antidepressantlarni qabul qilish fonida o‘z joniga qasd qilish to‘g‘risida fikrlar 25 yoshgacha bo‘lgan, ruhiy buzilishlari bo‘lgan patsiyentlarda ko‘proq uchragan.
Agar Sizda o‘z joningizga qasd qilish yoki o‘zingizga-o‘zingiz shikast yetkazish to‘g‘risida fikrlar paydo bo‘lgan bo‘lsa, bu haqida davolovchi shifokoringizga yoki darhol kasalxonaga murojaat qiling.
Siz tanishingizga yoki do‘stingizga Sizda depressiya yoki havotirlik borligi to‘g‘risida aytib, ushbu varaqani o‘qib chiqishni so‘rashingiz mumkin. Siz ulardan ahvolingiz yomonlashgani to‘g‘risida yoki xulqingizda biron narsa ularni bezovta qilayotgani haqida aytishni so‘rashingiz mumkin.
Bolalar va 18 yoshdan kichik o‘smirlar
Reksetinni bolalar va 18 yoshgacha bo‘lgan o‘smirlarda qo‘llash mumkin emas.
Siz 18 yoshdan kichik patsiyentlar ushbu guruhdagi preparatlarning o‘z joniga qasd qilish qilish va bu haqida fikrlar, adovatli xulq (tajovuzkorlik, antagonizm, g‘azabiylik) kabi nojo‘ya asoratlariga ko‘proq moyilligini yodda tutishingiz kerak. Agar shifokor 18 yoshgacha bo‘lgan patsiyentga Reksetin buyursa, va Siz buning sababini bilishni istasangiz, shifokorga takroriy maslahat uchun murojaat qiling. Reksetik qabul qilayotgan 18 yoshgacha bo‘lgan patsiyentda yuqorida aytib o‘tilgan asoratlardan birontasi paydo bo‘lsa yoki u kuchaysa, bu haqida shifokorga xabar berishingiz kerak.
Bundan tashqari, bu yoshdagi patsiyentlarda Reksitin preparatini uzoq muddat qo‘llash natijasida o‘sish, balog‘atga yetish, fikrlash qobiliyati rivojlanishi va xulqqa ta'siri to‘g‘risida ma'lumotlar mavjud emas.
Paroksetin 18 yoshgacha bo‘lgan patsiyentlarda qo‘llanilish bo‘yicha o‘tkazilgan tadqiqotlarda quyidagi nojo‘ya samaralar kuzatilgan (10 patsiyentdan 1 nafaridan kamrog‘ida): o‘z joniga qasd qilish to‘g‘risida fikrlarni kuchayishi, o‘z joniga qasd qilishga urinishlar, o‘ziga-o‘zi shikast yetkazish, dushmanlik, tajavuzkorlik, ishtahani yo‘qligi, qaltirash, normal bo‘lmagan terlash, giperfaollik (g‘ayrat oshib ketishi), ajitatsiya, emotsional sohada o‘zagarishlar (shu jumladan ko‘p yig‘lash va kayfiyatni o‘zgarishi), tanada ko‘kargan joylar paydo bo‘lishi yoki qon ketishi (masalan, burundan qon ketishi) kuchayishi. Bunday nojo‘ya asoratlar shakarli tabletkalarni (platsebo) qabul qilgan bolalar va o‘smirlarda ham kuzatilgan, ammo kamroq uchragan.
18 yoshgacha bo‘lgan ayrim patsiyentlarda ular paroksetinni qabul qilishni tugatgandan so‘ng bekor qilish samaralari vujudga kelgan. Bu samaralar paroksetinni qabul qilishni to‘xtatgan kattalarda vujudga kelgan samaralarga o‘xshash bo‘lgan (“Reksetin preparatini qabul qilish usuli” bo‘limini qarang). Bundan tashqari 18 yoshgacha bo‘lgan patsiyentlar ko‘p hollarda (1/10 dan kamroq) me'dada og‘riq, asabiylik va kayfiyat o‘zgaruvchanligi (shu jumladan yig‘loqlik, kayfiyat o‘zgarishi, o‘ziga-o‘zi shikast yetkazishga harakatlar, o‘z joniga qasd qilish to‘g‘risida fikrlar va o‘z joniga qasd qilishga urinishlar) to‘g‘risida shikoyat qilishgan.
Paroksetinning muhim nojo‘ya samaralari
Paroksetin qabul qilgan ayrim patsiyentlarda akatiziya deb nomlanadigan holat vujudga kelishi mumkin, unda ular bezovtalik his qilib, bir joyda tura olmaydi yoki o‘tira olmaydi. Boshqa patsiyentlarda serotonin sindromini tashkil etuvchi bitta yoki bir nechta simptomlar rivojlanishi mumkin: ongni chalkashishi xissi, bezovtalik, terlash, qaltirash, isitma, gallyutsinatsiyalar (g‘ayritabiiy tovushlar va tasvirlar), mushak tortilishi yoki yurak urishini tezlashishi.
Agar Siz shunday simptomlarni his qilsangiz, shifokorga murojaat qiling.
Reksitin preparatining ushbu va boshqa nojo‘ya samaralari to‘g‘risida batafsil ma'lumotni “Bo‘lishi mumkin bo‘lgan nojo‘ya samaralar” 4-bo‘limda qarang.
Boshqa preparatlar va Reksetin
Agar Siz boshqa dori vositalarini qabul qilayotgan, yaqinda qabul qilgan bo‘lsangiz yoki qabul qilishingiz mumkin bo‘lsa, bu haqida shifokorga xabar bering.
Ayrim dori vositalar Reksetin preparati samarasiga ta'sir ko‘rsatishlari yoki uning nojo‘ya asoratlari vujudga kelishi xavfini oshirishi mumkin. Reksitin ham boshqa dori vositalar samarasiga ta'sir ko‘rsatishi mumkin.
Xususan:
- Monoaminoksidaza ingibitorlari deb nomlanadigan preparatlar (MAOI, shu jumladan moklobemid) –“Reksetinni qabul qilmang” bo‘limini qarang, shuningdek ko‘k metilen (jarrohlik operatsiyalarida bo‘yoq sifatida qo‘llaniladi).
- Tioridazin yoki pimozid (antipsixotik preparatlar) – “Reksetinni qabul qilmang” bo‘limini qarang.
- Atsetilsalitsil kislotasi, ibuprofen yoki boshqa nosteroid yallig‘lanishga qarshi preparatlar (NYaQP), masalan, selekoksib, etodolak, diklofenak va meloksikam, og‘riq qoldiruvchi vositalar sifatida va yallig‘lanish kasalliklarida qo‘llaniladi.
- Tramadol (og‘riq qoldiruvchi vosita).
- Triptanlar, masalan, sumatriptan, migrenni davolashda qo‘llaniladi.
- Boshqa antidepressantlar, shu jumladan boshqa SQQOSI, tritsiklik antidepressantlar, masalan, klomipramin, nortriptilin va dezipramin.
- Triptofan (oziq-ovqat qo‘shimchasi).
- Mivakuriy yoki suktsinilxolin (umumiy narkozda qo‘llaniladigan preparatlar).
- Litiy, risperidon va klozapin (antipsixotik preparatlar), ayrim ruhiy kasalliklarni davolashda qo‘llaniladi.
- Fentanil, umumiy narkozda qo‘llaniladigan yoki surunkali og‘riqni davolash uchun ishlatiladi.
- Fosamprenavir va ritonavir majmuasi, OITV davolanishda qo‘llaniladi.
- Teshik dalachoy (Hypericum perforatum) – depressiyaga qarshi dorivor o‘simlikdan tayyorlanadigan preparat.
- Fenobarbital, natriy valproati yoki karbamazepin, mushak tortishi va tutqanoqni davolash uchun qo‘llaniladi.
- Atomoksetin, e'tibor yetishmovchiligi sindromi va giperfaollikni davolash uchun qo‘llaniladi.
- Protsiklidin, Parkinson kasalligida titrashni to‘xtatish uchun qo‘llaniladi.
- Varfarin va qonni suyultirish uchun boshqa preparatlar (antikoagulyantlar).
- Propafenon, flekainid va yurak aritmiyalarini davolash uchun qo‘llaniladigan boshqa preparatlar.
- Metoprolol – arterial gipertenziya va yurak muammolarini davolash uchun beta-blokator.
- Pravastatin – xolesterin miqdorini kamaytirish uchun preparat.
- Rifampitsin – tuberkulyoz va moxovni davolash uchun preparat.
- Linezolid (antibiotik).
- Tamoksifen, ko‘krak bezi saratonini davolash uchun preparat.
Agar Siz yuqorida aytib o‘tilgan preparatlarning birontasini yaqinda qabul qilgan bo‘lsangiz yoki qabul qilayotgan bo‘lsangiz, bu haqida shifokor bilan maslahatlashing va Siz nima qilishingiz kerakligi to‘g‘risida undan so‘rang.
Reksetin preparatini ovqat va ichimliklar bilan o‘zaro ta'siri
Reksetin preparati bilan davolanganda, spirtli ichimliklar iste'mol qilmang. Spirtli ichimlik simptomlarni yoki nojo‘ya asoratlarni kuchaytirishi mumkin. Reksetinni ertalab nonushta bilan qabul qiling – bu nojo‘ya samaralar vujudga kelishi xavfini kamaytiradi.
Homiladorlik, emizish davri va fertillik
Agar Siz homilador bo‘lsangiz yoki emizayotgan bo‘lsangiz, yoki homiladorlik ehtimoli bo‘lsa, yoxud homiladorlikni rejalashtirayotgan bo‘lsangiz, mazkur preparatni qabul qilishni boshlashdan oldin shifokor yoki farmatsevt bilan maslahatlashing.
Agar Siz Reksetinni qabul qilayotgan vaqtda homiladorlik to‘g‘risida bilib qolsangiz, darhol buni shifokor bilan muhokama qiling. Homiladorlikni rejalashtirayotgan bo‘lsangiz ham, shifokor bilan maslahatlashing.
Homiladorlikning birinchi bir necha oyi davomida paroksetin qabul qilgan onalarning chaqaloqlarida rivojlanishning tug‘ma nuqsonlari, shu jumladan yurak nuqsoni to‘g‘risida bir nechta xabarlar kelgan. Umumiy aholida 100 dan taxminan bitta bola yurak nuqsoni bilan tug‘iladi. Agar bola onasi homiladorlik vaqtida paroksetin qabul qilgan bo‘lsa, xavf darajasi ikki marta oshadi. Ehtimol davolovchi shifokor bilan homiladorlik davrida Reksetin qabul qilishni asta-sekin bekor qilishga qaror qilasiz. Ammo vaziyatga qarab, shifokor Reksetin preparatini qabul qilishni davom ettirishingiz zarur deb hisoblashi mumkin.
Shifokoringiz yoki akusheringiz Siz Reksetin preparatini qabul qilayotganingiz to‘g‘risida bilishiga ishonch hosil qiling. Reksetin kabi preparatlar homiladorlik davrida, ayniqsa kechki muddatlarda bolada chaqaloqlarning surunkali o‘pka gipertenziyasi (ChSO‘G) deb ataladigan jiddiy holat rivojlanishi xavfini oshirishi mumkin. ChSO‘G da yurak va o‘pka o‘rtasidagi qon tomirlarida qon bosimi juda yuqori bo‘ladi. Agar Siz homiladorlikning oxirgi uch oyida Reksetin qabul qilayotgan bo‘lsangiz, chaqalog‘ingizda boshqa patologik holatlar ham vujudga kelishi mumkin, ular odatda tug‘ilgandan so‘ng birinchi 24 soat ichida quyidagi simptomlar bilan namoyon bo‘ladi:
- nafas olish qiyinlashishi,
- terini ko‘karishi yoki u juda issiq yoki sovuq bo‘lishi,
- lablarni ko‘karishi,
- qusish yoki emizish bilan muammolar,
- yaqqol xolsizlik, uxlamaydi yoki juda ko‘p yig‘laydi,
- mushaklar tarangligi yoki bo‘shashishi,
- tremor, titrash, tirishish,
- yaqqol ixtiyorsiz harakatlar.
Agar tug‘ilganda bolangizda yuqorida aytib simptomlardan birontasi bo‘lsa yoki Siz uning ahvolidan havotirda bo‘lsangiz, maslahat uchun shifokorga yoki akusherga murojaat qiling.
Reksetin ko‘krak sutiga juda kam miqdorda o‘tishi mumkin. Agar Siz Reksetin qabul qilayotgan bo‘lsangiz, bolani emizishdan avval shifokor bilan maslahatlashing. Ehtimol shifokor bilan Reksetin preparati bilan davolash fonida emizishni davom ettirishga qaror qabul qilasiz.
Hayvonlarda o‘tkazilgan tadqiqotlar paroksetin spermaning sifatini yomonlashtirishini ko‘rsatdi. Hozirgi vaqtgacha preparatning odamning fertilligiga salbiy ta'siri aniqlanmagan, ammo nazariy jihatdan bunday samara vujudga kelishi mumkin.
Avtotransportni boshqarish va mexanizmlar bilan ishlash.
Reksetin preparatining kuzatilishi mumkin bo‘lgan nojo‘ya samaralari bosh aylanishi, ongni chalkashishi, uyquchanlik yoki ko‘rish qobiliyati pasayishini o‘z ichiga oladi. Agar Sizda bunday nojo‘ya samaralar vujudga kelsa, transport vositasini boshqarish va mexanizmlar bilan ishlashdan bosh torting.
3. Reksetin preparatini qanday qabul qilinadi
Doimo davolovchi shifokor yo‘riqnomalariga rioya qiling. Biror narsada shubhangiz bo‘lsa, shifokor yoki farmatsevtga qayta murojaat qiling.
Turli holatlarda tavsiya etilgan dozalar jadvalda keltirilgan.
Boshlang‘ich doza Tavsiya etilgan sutkalik doza Maksimal sutkalik doza
Depressiya 20 mg 20 mg 50 mg
Obsessiv-kompulsiv buzilish 20 mg 40 mg 60 mg
Sarosimali buzilish 10 mg 40 mg 60 mg
Ijtimoiy havotirli buzilish 20 mg 20 mg 50 mg
Jarohatdan so‘nggi stress holati 20 mg 20 mg 50 mg
Tarqalgan havotirli buzilishlar 20 mg 20 mg 50 mg
Shifokoringiz Sizga davolashni Reksetin preparatining qanday dozasidan boshlashni aytadi.
Ko‘pchilik patsiyentlar ikki haftadan so‘ng o‘zini yaxshi his qila boshlaydi. Agar shu vaqtgacha vaziyat yaxshilanishini sezmasangiz, davolovchi shifokoringizga murojaat qiling. U dozani haftada 10 mg dan maksimal sutkalik dozagacha oshirish to‘g‘risida qaror qabul qilishi mumkin.
Tabletkalarni ertalab nonushta bilan qabul qiling.
Yuting va suv iching.
Chaynamang.
Shifokoringiz tabletkalarni qancha muddat qabul qilishigizni belgilaydi. Davolash ko‘p oy va undan ortiq davom etishi mumkin.
Keksa patsiyentlar
65 yoshdan katta patsiyentlar uchun maksimal sutkalik doza 40 mg ni tashkil etadi.
Jigar va buyrak kasalliklari bo‘lgan patsiyentlar
Agar Sizda jigar yoki buyraklar bilan bog‘liq muammolar bo‘lsa, davolovchi shifokor Reksetinning pastroq dozasini buyurishi mumkin.
Agar Siz Reksetin preparatini keragidan ortiq qabul qilgan bo‘lsangiz.
Hech qachon davolovchi shifokor tavsiya etgan dozadan ortiq dozada preparatni qabul qilmang.
Agar Siz (yoki boshqa odam) juda ko‘p Reksetin tabletkalarini qabul qilgan bo‘lsangiz, darhol shifokorga yoki kasalxonaga murojaat qiling. Preparat o‘ramini ko‘rsating.
Reksetin preparatini dozasi oshirib yuborilganida 4-bo‘limda (“Bo‘lishi mumkin bo‘lgan nojo‘ya samaralar”) ko‘rsatilgan simptomlar, shuningdek holsizlik, ko‘z qorachig‘ini kengayishi, isitma, bosh og‘rig‘i, ixtiyorsiz mushak qisqarishlari vujudga kelishi mumkin.
Agar Siz Reksetin preparatini qabul qilishni unutgan bo‘lsangiz
Preparatni har kuni bir vaqtda qabul qiling.
Agar navbatdagi dozani qabul qilishni unutib, bu haqida uxlashdan oldin eslagan bo‘lsangiz, darhol uni qabul qiling. Keyingi kuni odatdagi vaqtda qabul qiling. Unutilgan dozaning o‘rnini bosish uchun dozani ikki marta qabul qilmang.
Agar navbatdagi dozani qabul qilishni unutib, bu haqida kechasi yoki ertalab eslasangiz, unutilgan dozani yoddan chiqaring. Ehtimol Sizda bekor qilish samarasi vujudga keladi, ammo navbatdagi dozani odatdagi paytda qabul qilganingizda, bu samaralar bartaraf etiladi.
O‘zingizni yaxshi sezmasangiz, nima qilish kerak?
Reksetin darhol ahvolni yaxshilamaydi – barcha antidepressantlar bir qancha vaqtdan ta'sir qila boshlaydi. Ayrim odamlar birinchi ikki haftadan so‘ng o‘zini yaxshi sezadi, boshqalarda bu ko‘proq vaqt talab qiladi. Antidepressantlarni qabul qilayotgan ayrim odamlar oldin o‘zlarini yanada yomonroq his qiladi, so‘ng ularning ahvoli yaxshilanadi. Agar o‘zingizni ikki haftadan so‘ng yaxshi sezmasangiz, shifokor bilan maslahatlashing, u kerakli tavsiyalar beradi. Shifokor davolash boshlanganidan ikki hafta o‘tgach, Sizni takroriy ko‘rikka taklif qilishi kerak. Agar Sizda ahvol yaxshilanmasa, bu haqida shifokorga xabar bering.
Agar Siz Reksetinni qabul qilishni to‘xtatsangiz.
Davolovchi shifokor ko‘rsatma bermaguncha Reksetinni qabul qilishni to‘xtatmang.
Reksetinni bekor qilganda davolovchi shifokor bir necha hafta yoki oy davomida dozani asta-sekin kamaytirishi mumkin – bu bekor qilish sindromi paydo bo‘lishi xavfini kamaytiradi. Reksetin dozasini kamaytirishning bir usuli, bu uning dozasini haftasida 10 mg dan kamaytirish hisoblanadi. Aksariyat patsiyentlarning fikricha, Reksetin bekor qilinganda, yengil simptomlar paydo bo‘ladi, va ular ikki hafta davomida o‘z-o‘zidan yo‘qoladi. Ayrim patsiyentlar bu simptomlarni uzoqroq va qiyinroq boshdan kechirishadi.
Agar Sizda bekor qilish simptomi vujudga kelsa, davolovchi shifokor dozani kamaytirish muddatini uzaytirishni haqida maslahat berishi mumkin. Agar bekor qilish sindromi og‘ir bo‘lsa, bu haqida shifokorga xabar bering. Ehtimol shifokor preparatni qabul qilishni tiklaydi va dozani sekinroq kamaytiradi.
Sizda bekor qilish sindromi vujudga kelsa ham, Siz davolanishni to‘xtatishingiz mumkin.
Davolash to‘xtatilganda kuzatilishi mumkin bo‘lgan bekor qilish sindromi samaralari
Tadqiqotlarda Reksetin qabul qilinishi bekor qilinganda 10 patsiyentdan 3 nafarida bekor qilish sindromining bir yoki bir nechta simptomi kuzatilishi aniqlangan. Ayrim asoratlar boshqalarga nisbatan ko‘proq uchraydi.
Tez­tez uchraydigan nojo‘ya samaralar (100 patsiyentdan 1-10 nafarida):
- Bosh aylanishi, beqarorlik yoki muvozanatni buzilishi;
- Sanchish, achishish hissi va (kamroq) elektr toki urishi hissi, shu jumladan boshga;
- Quloqlarda shovqin, shivirlash, hushtak ovozi, jarang va boshqa turg‘un tovushlar (tinnit);
- Uyquni buzilishi (yorqin tushlar, tungi dahshatlar, uxlayolmaslik);
- Havotirlik;
- Bosh og‘rig‘i.
Tez­tez bo‘lmagan nojo‘ya samaralar (1000 patsiyentdan 1-10 nafarida):
- Ko‘ngil aynishi;
- Terlash (shu jumladan tunda terlash);
- bezovtalik yoki qo‘zg‘alishni his qilish;
- Tremor (titrash);
- Ong chalkashishi hissi yoki dezoriyentatsiya;
- Diareya (ich ketishi);
- Emotsional beqarorlik yoki ta'sirchanlik;
- Ko‘rishni buzilishi;
- Yurak urishini tezlashishi (yurak dukkillaydi va sakraydi)
Agar Reksetin preparatanini bekor qilgandan so‘ng bekor qilish sindromi vujudga kelishi Sizni bezovta qilsa, shifokorga murojaat qiling.
Agar siz Reksetinni qabul qilishni to‘xtatgan bo‘lsangiz
Davolovchi shifokor ko‘rsatma bermaguncha Reksetinni qabul qilishni to‘xtatmang.
Agar sizda preparatni qabul qilish bo‘yicha boshqa savollar paydo bo‘lsa, shifokor yoki farmatsevtga murojaat qiling.
4. Bo‘lishi mumkin bo‘lgan nojo‘ya samaralar
Boshqa dori preparatlar kabi bu preparat ham nojo‘ya samaralarni vujudga keltirishi mumkin, ammo u hammada ham paydo bo‘lmaydi. Nojo‘ya samaralar odatda davolanishning birinchi haftalarida paydo bo‘ladi.
Agar Sizda davolanish vaqtida nojo‘ya samara vujudga kelsa, shifokorga murojaat qiling.
Sizga shifokor maslahati yoki kasalxonaga tezkor murojaat zarur bo‘lishi mumkin.
Tez­tez bo‘lmagan nojo‘ya samaralar (1000 patsiyentdan 1-10 nafarida):
- Agar Sizda odatdagi bo‘lmagan ko‘karishlar yoki qon ketishi vujudga kelsa, shuningdek qon aralash qusish yoki axlatda qon paydo bo‘lsa, darhol shifokorga yoki kasalxonaga murojaat qiling.
- Agar siyish imkoniyati yo‘q bo‘lib qolsa (siydik chiqmasa) darhol shifokor yoki kasalxonaga murojaat qiling.
Kam hollarda uchraydigan nojo‘ya samaralar (10000 patsiyentdan 1-10 nafarida):
- Agar tirishishlar (xurujlar) paydo bo‘lsa, darhol shifokor yoki kasalxonaga murojaat qiling.
- Agar Siz bezovtalik his qilsangiz, bir joyda tura olmasangiz yoki o‘tira olmasangiz, bu akatiziya deb nomlanadigan holatini bildiradi. Reksetin preparati dozasini oshirganda bunday his zo‘rayishi mumkin. Agar bunday vaziyat vujudga kelsa, shifokorga murojaat qilish kerak.
- Agar Siz charchoqlik, holsizlik yoki ongni chalkashishini his qilsangiz yoki Sizda mushaklar qotib, og‘risa va mushaklar koordinatsiyasi buzilsa, bu qonda natriy miqdori kamayib ketganini bildiradi. Agar bunday simptomlar vujudga kelsa, shifokorga murojaat qilish kerak.
Juda kam hollarda uchraydigan nojo‘ya samaralar (10000 patsiyentdan 1 nafaridan kamida):
- Reksetinga allergik reaktsiyalar, ba'zan og‘ir darajada.
- Agar Sizda terida qizil yoki shishgan toshmalar, qovoqlar, yuz, lab, og‘iz yoki til shishi paydo bo‘lsa yoki nafas olish qiyin (hansirash) bo‘lsa yoxud yutish qiyin bo‘lsa, va xushdan ketishga olib keluvchi xolsizlik va bosh aylanishi bo‘lsa, darhol shifokorga xabar bering yoki kasalxonaga murojaat qiling.
- Sizda quyida aytib o‘tilgan simptomlardan biri yoki barchasi paydo bo‘lsa, bu serotonin sindromi bo‘lishi mumkin. Quyidagi simptomlarga e'tibor berish kerak: ongni chalkashishi hissi, betoqatlik, terlash, titrash, qaltirash, gallyutsinatsiyalar (g‘alati tovush yoki tasvirlar), mushaklarni birdan tortishi yoki yurak urishini tezlashishi. Agar bunday holatni sezsangiz, shifokorga murojaat qiling.
- O‘tkir glaukoma (ko‘zning ichki bosimini birdan oshib ketishi).
Agar Sizda ko‘zda og‘riq paydo bo‘lsa va ko‘rish xiralashsa, shifokor bilan maslahatlashing.
Tez-tezligi noma'lum (mavjud ma'lumotlar asosida baholab bo‘lmaydi):
- Ayrim patsiyentlarda Reksetin preparatini qabul qilish vaqtida yoki uni bekor qilgandan so‘ng o‘ziga jarohat yetkazish, o‘z joniga qasd qilish to‘g‘risida fikrlar, tajavuzkorlik paydo bo‘ladi.
Davolanish vaqtida kuzatilishi mumkin bo‘lgan boshqa nojo‘ya samaralar
Juda ko‘p uchraydigan nojo‘ya samaralar (10 patsiyentdan 1 nafaridan ortig‘ida)
- Ko‘ngil aynishi. Preparatni ertalab nonushta bilan qabul qilganda, ko‘ngil aynish ehtimoli kamayadi.
- Jinsiy disfunktsiya. Masalan, orgazm yo‘qligi va erkaklarda patologik erektsiya va eyakulyatsiya.
- Diqqatni jamlashni buzilishi.
Tez­tez uchraydigan nojo‘ya samaralar (100 patsiyentdan 1-10 nafarida):
- Qonda xolesterin miqdori oshishi.
- Ishtaha yo‘qligi.
- Uyqu buzilishi (uyqusizlik) yoki uyquchanlik.
- G‘ayritabiiy tushlar (shu jumladan tungi dahshatlar).
- Bosh aylanishi yoki tremor.
- Bosh og‘rishi.
- Diqqatni jamlashda qiyinchilik.
- Qo‘zg‘aluvchanlik.
- Patologik xolsizlik.
- Ko‘rishni noaniqligi.
- Esnash, og‘izni qurishi.
- Diareya yoki qabziyat.
- Qusish.
- Tana vaznini oshishi.
- Terlash.
Tez­tez bo‘lmagan nojo‘ya samaralar (1000 patsiyentdan 1-10 nafarida):
- Tez turganda bosh aylanishi va xushdan ketish (bu arterial qon bosimi qisqa vaqtga pasayishi natijasi hisoblanadi).
- Yurak urishini tezlashishi.
- Og‘iz va til qotishi, titrashi yoki g‘ayritabiiy harakatlari.
- Ko‘z qorachig‘ini kengayishi.
- Teri toshmalari.
- Ongni chalkashishi hissi.
- Gallyutsinatsiyalar (g‘alati tasvir va tovushlar).
- Siydik chiqmasligi (siydikni tutilishi) yoki nazoratsiz, ixtiyorsiz siyish (siydikni tutaolmaslik).
- Agar Sizda qandli diabet bo‘lsa, Reksetinni qabul qilish fonida Siz qonda qand miqdori ustidan nazoratni yo‘qotganligingizni sezishingiz mumkin. Iltimos, insulin dozasini yoki boshqa intidiabetik preparatlar dozasiga tuzatish kiriitish haqida davolovchi shifokoringiz bilan maslahatlashing.
Kam hollarda uchraydigan nojo‘ya samaralar (10000 patsiyentda 1-10 nafarida):
- Erkaklar va ayollarda ko‘krak suti patologik ajralib chiqishi.
- Yurak urishini sekinlanishi.
- Qonning jigar testlarida aniqlanadigan jigarga ta'sir.
- Sarosima xurujlari;
- Giperfaol xulq yoki fikrlar (maniya).
- O‘z shaxsini anglay olmaslik (depersonalizatsiya).
- Havotirlik.
- Oyoqlar bilan beto‘xtov harakat qilish ehtiyoji (bezovta oyoqlar sindromi).
- Bo‘g‘imlar yoki mushaklarda og‘riq.
- Qon zardobida prolaktin miqdorini oshishi.
- Hayz sikli buzilishi (ko‘p miqdorda hayz kelishi, hayz orasida qon ketishi, hayz kechikishi, nomuntazam hayz).
Juda kam hollarda uchraydigan nojo‘ya samaralar (10000 patsiyentdan kamida 1 nafarida):
- Terida toshma, pufaklar paydo bo‘lishi mumkin, toshma mayda nishonlarga o‘xshashi mumkin (och rangli tusda to‘q chetli qora nuqta) – ko‘p shaklli eritema.
- Pufakli va terini ajralishi bilan kechuvchi tarqalgan toshma, xususan og‘iz bo‘shlig‘ida, burun, ko‘z va jinsiy a'zolarda (Stivens-Djonson sindromi).
- Tananing katta qismida pufakli va terini ajralishi bilan kechuvchi tarqalgan toshma (toksik epidermal nekroliz).
- Teri yoki ko‘zning oqsilini sarg‘ayishiga olib keladigan jigar bilan bog‘liq muammolar.
- Antidiuretik gormoni noadekvat ajralishi sindromi (ADGNAS), bu vaziyatda organizmda ortiqcha miqdorda suyuqlik to‘planadi va qonda natriy miqdori kamayib ketadi. ADGNAS bo‘lgan patsiyentlarda odatda og‘ir darajadagi shikoyatlar paydo bo‘ladi, ammo ba'zi vaziyatlarda shikoyat bo‘lmaydi.
- Qo‘l va oyoqlar shishiga olib keladigan organizmda suyuqlik to‘planishi.
- Quyosh nurlariga sezuvchanlik.
- Og‘riqli turg‘un erektsiya.
- Qonda trombotsitlar miqdori kamayishi.
Reksetin preparatini qabul qilayotgan ayrim patsiyentlarda quloqlarda shovqin, shivirlash, hushtak ovozi, jarang va boshqa turg‘un tovushlar (tinnit) paydo bo‘ladi.
Bu turdagi preparatlarni qabul qilayotgan patsiyentlarda suyak sinishi havfi yuqori.
Agar Reksetinni qabul qilishda biror xavf bo‘yicha havotirlansangiz, davolovchi shifokor yoki farmatsevtga murojaat qiling.
5. Saqlash sharoiti va yaroqlilik muddati
+15oC dan +30oC gacha haroratda saqlansin.
Preparatni bolalar ololmaydigan joyda saqlansin.
Yaroqlilik muddati – 5 yil.
O‘ramda ko‘rsatilgan yaroqlilik muddati o‘tgach preparat qo‘llanilmasin.
Yaroqlilik muddati oyning oxirgi kuni bo‘yicha aniqlanadi.
Dori vositasini kanalizatsiya yoki maishiy chiqindilar uchun konteynerga tashlamang. Boshqa kerak bo‘lmagan preparatni utilizatsiya qilish to‘g‘risida ma'lumotni farmatsevtdan oling. Bu choralar atrof-muhitni himoya qilishga yordam beradi.
6. O‘rami va boshqa ma'lumot
Reksetin preparatining tarkibi
Ta'sir etuvchi modda: plyonka bilan qoplangan har bir tabletkada 20 mg paroksetin (22,760 mg paroksetin gidroxloridi gemigidrati ko‘rinishida).
Yordamchi moddalar:
Tabletka yadrosi: magniy stearati, natriy karboksimetil kraxmali (A turi), gipromelloza, kaltsiy gidrofosfati digidrati.
Plyonka qobig‘i: polisorbat 80, makrogol 400, makrogol 6000, titan dioksidi (E171), gipromelloza.
Reksetin preparati ta'rifi
Dumaloq shaklli, ikki tomonlama qavariq, diametri 9 mm li, oq yoki deyarli oq rangli plyonka bilan qoplangan tabletkalar. Bir tomonida riskasi va boshqa tomonida x
20
gravirovka mavjud
Riska bo‘yicha tabletkani ikkita bir xil bo‘lakka bo‘lish mumkin.

O‘rami

Plyonka bilan qoplangan 10 ta tabletka, PVX va alyuminiy folgali tiniq bo‘lmagan blisterda.
3 ta blister qo‘llash bo‘yicha yo‘riqnomasi bilan birga karton qutida.
Berish tartibi
Retsept bo‘yicha.
Ishlab chiqaruvchi to‘g‘risida ma'lumot
«Gedeon Rixter» OAJ 1103, Budapesht sh., Demrei ko‘chasi, 19-21, Vengriya
Ishonch telefoni (qo‘ng‘iroq bepul): 7-800-555-00777
Elektron manzil: drugsafety@g-richter.ru