Spazmalgon 5ml №5

Tavsif

Preparatning savdo nomi

Spazmalgon®
Ta'sir etuvchi moddalar (XPN): metamizol natriy, pitofenon gidroxloridi, fenpiveriniy bromidi

Dori shakli

in'ektsiya uchun eritma

Tarkibi

Har bir 2 ml in'ektsiya uchun eritmali ampula quyidagilarni saqlaydi:
faol moddalar: 1000 mg metamizol natriy (metamizole sodium), 4 mg pitofenon gidroxloridi (pitofenone hydrochloride), 0,04 mg fenpiveriniy bromidi (fenpiverinium bromide).
Har bir 5 ml in'ektsiya uchun eritmali ampula quyidagilarni saqlaydi:
faol moddalar: 2500 mg metamizol natriy (metamizole sodium), 10 mg pitofenon gidroxloridi (pitofenone hydrochloride), 0,1 mg fenpiveriniy bromidi (fenpiverinium bromide). yordamchi moddalar: in'ektsiya uchun suv.

Ta'rifi

tiniq, deyarli zarrachalar saqlamaydigan och-sariq rangli suyuqlik.

Farmakoterapevtik guruhi

analgetik-spazmolitik.
ATX kodi: A03DA02

Farmakologik xususiyatlari

Farmakodinamikasi

Spazmalgon – yaqqol spazmolitik va analgetik faollikka ega bo‘lgan majmuaviy dori preparatidir.
Metamizol kuchsiz yallig‘lanishga qarshi va spazmolitik faollik bilan birga yaqqol analgetik va antipiretik ta'sirga ega.
Fenpiverin me'da, ichak, o‘t va siydik chiqarish yo‘llarining silliq mushaklari tonusi va motorikasini susaytiradi.
Pitofenon gidroxloridi silliq mushaklarga yaqqol spazmolitik ta'sir ko‘rsatadi.

Farmakokinetikasi

So‘rilishi: Mushak ichiga yuborilganida tez so‘riladi. Metamizol taxminan 85% tizimli biokiraolishlikka ega.
Taqsimlanishi: Metamizol plazma proteinlari bilan 50-60% bog‘lanadi. Gemato-entsefalik va yo‘ldosh to‘sig‘i orqali o‘tadi. Taqsimlanish xajmi – taxminan 0,7 l/kg ni tashkil qiladi.
Metabolizmi: Jigarda jadal biotransformatsiyaga uchraydi. Uning asosiy metaboliti 4-metil-amino-antipirin ikkita metaboliti, shu jumladan farmakologik faol bo‘lgan 4-amino-antipirin (AA) hosil bo‘lishi bilan jigarda metabolizmga uchraydi.
Plazmadagi maksimal kontsentratsiyalari (hamma metabolitlariga nisbatan) taxminan 30-90 minutdan keyin aniqlanadi.
Chiqarilishi: Metabolitlari shaklida buyrak orqali chiqariladi, bunda metamizolning chiqarilgan miqdorining 3% o‘zgarmagan holda chiqariladi. Yarim chiqarilish davri taxminan 10 soatni tashkil qiladi.
Jigar funktsiyasini buzilishi bo‘lgan patsiyentlar: MAA faol metabolitining yarim chiqarilish davri jigar funktsiyasini buzilishlari bo‘lgan patsiyentlarda taxminan 3 marta uzayadi. Bunday patsiyentlarga metamizolning pastroq dozalari bilan davolanish tavsiya qilinadi.
Buyrak funktsiyasini buzilishlari bo‘lgan patsiyentlar: Buyrak funktsiyasini buzilishlari bo‘lgan patsiyentlarda ayrim metabolitlarining chiqarilish darajasini pasayishi kuzatiladi. Bunday patsiyentlarga metamizolning pastroq dozalari bilan davolanish tavsiya qilinadi.

Qo‘llanilishi

Spazmalgon me'da-ichak yo‘llari, o‘t yo‘llari, buyrak va siydik chiqarish yo‘llarining silliq mushaklarini spazmlarida, buyrak-tosh kasalligi, og‘riqli hayz ko‘rishda (dismenorreya) o‘tkir, o‘rtachadan kuchligacha bo‘lgan og‘riqlarni qisqa muddatli bartaraf qilish uchun qo‘llanadi.

Qo‘llash usuli va dozalari

Spazmalgonni doimo ushbu qo‘llash bo‘yicha yo‘riqnomada ko‘rsatilgan ko‘rsatmalarga aniq rioya qilgan holda qo‘llang. Agar Siz biron bir narsaga ishonch hosil qilmasangiz, shifokoringiz yoki farmatsevtdan so‘rang.
Spazmalgon in'ektsiya uchun eritmasi mushak ichiga yuboriladi.
Faqat qisqa muddatli davolash uchun ishlating!
Shifokor nazorati ostida va o‘ta yuqori sezuvchanligi bo‘lgan patsiyentlarda anafilaktik shok paydo bo‘lishi xavfi tufayli, shoshilinch yordam ko‘rsatish uchun tayyorgarlik bo‘lganida yuboriladi.
Kattalar va 15 yoshdan oshgan o‘smirlar: Kattalar va 15 yoshdan oshgan o‘smirlar (>53 kg) uchun odatdagi doza bir marta mushak ichiga 2-5 ml ni tashkil qiladi. Zarurati bo‘lganida doza har 6-8 soatda takrorlanadi. Maksimal sutkalik doza 6 ml in'ektsiya uchun eritmadan (3 g metamizol natriyga ekvivalent) oshmasligi kerak.
65 yoshdan oshgan patsiyentlar: Odatda dozani kamaytirish talab qilinmaydi. Yoshga bog‘liq bo‘lgan jigar va buyrak funktsiyasini buzilishlari bo‘lgan patsiyentlarda preparatning dozasini kamaytirish kerak. Dozani davolovchi shifokor belgilaydi.
Buyrak funktsiyasini buzilishi bo‘lgan patsiyentlar: Kattalar uchun buyurilgan dozaning ½ qismi qo‘llanadi, chunki moddaning chiqarilish tezligi buyrak funktsiyasini buzilishlarida sekinlashadi.
Jigar funktsiyasini buzilishi bo‘lgan patsiyentlar: Yuqori dozalarni qo‘llashdan saqlanish kerak. Qisqa muddatli qo‘llashda dozani pasaytirishning zarurati yo‘q.
Davolash davomiyligi 2-3 kun.
Davolash samarasiga erishilganidan so‘ng, peroral og‘riqni qoldiruvchi va spazmolitik vositalar bilan davolashga o‘tish mumkin.
Agar Sizda ushbu preparatni qabul qilish bo‘yicha har qanday qo‘shimcha savollar bo‘lsa, davolovchi shifokor yoki farmatsevtga murojaat qiling.
Nojo‘ya ta'sirlari
Barcha dori vositalari kabi, har bir patsiyentda paydo bo‘lavermasligiga qaramasdan, Spazmalgon nojo‘ya ta'sirlar chaqirishi mumkin.
Nojo‘ya ta'sirlari tez-tezligi bo‘yicha quyidagicha tasniflanadi: juda tez-tez (≥1/10), tez-tez (≥1/100 va <1/10), tez-tez emas (≥1/1000 va <1/100), kam hollarda (≥1/10000 va <1/1000), juda kam hollarda (<1/10000), tez-tezligi noma'lum (mavjud ma'lumotlardan baho berish mumkin emas).
Quyida sanab o‘tilgan nojo‘ya reaktsiyalari dori preparati tarkibiga kiruvchi metamizol tomonidan chaqiriladi.
Tez-tez emas (100 odamdan 1 nafaridan kamrog‘ida namoyon bo‘ladi)
Teri toshmalari (ekzantema) – oval, plastinkalar shaklidagi, binafshadan to‘q-qizil rangli pufakchalar. Yuborish vaqtida yoki yuborishdan so‘ng – o‘ta yuqori sezuvchanlikning boshqa belgilari bilan birga kechmaydigan qon bosimini pasayishi, pulsni tezlashishi.
Kam hollarda (1000 odamdan 1 nafaridan kamrog‘ida namoyon bo‘ladi)
Leykopeniya (oq qon xujayralarining sonini kamayishi, bu infektsiyalarni rivojlanish ehtimolini oshiradi), makulopapulyoz toshmalar (teri plastinkalari va tugunlarini hosil bo‘lishi), anafilaktik va anafilaktoid reaktsiyalar, ayniqsa parenteral qo‘llashdan keyin. Bunday reaktsiyalar preparatni yuborish vaqtida yoki bevosita yuborilganidan keyin, ammo yuborilganidan so‘ng bir necha soatdan keyin ham paydo bo‘lishi mumkin. Ular ko‘proq in'ektsiyadan keyin birinchi soat davomida paydo bo‘ladi. Yengilroq reaktsiyalar teri va shilliq qavatlar tomonidan tipik reaktsiyalar ko‘rinishida (masalan, qichishish, achishish, qizarish, toshmalar, eshakemi, shishlar), dispepsiya va ayrim hollarda me'da-ichak shikoyatlari namoyon bo‘ladi. Ushbu yengil reaktsiyalar tarqalgan eshakemi, og‘ir angioedema (shu jumladan, laringeal), og‘ir bronxospazm, yurak ritmini buzilishi, qon bosimini pasayishi (ba'zida avval qon bosimini oshishi bilan) va siydik miqdorini oshishi yoki kamayishi, buyrakni yallig‘lanishi bilan kechuvchi buyrak faoliyatini buzilishi bilan ifodalanuvchi og‘ir shakllariga o‘tishi mumkin.
Spazmalgon preparati bilan davolanish vaqtida siydik qizil rangga bo‘yalishi mumkin. davolash to‘xtatilganidan keyin rangi normallashadi.
Juda kam hollarda (10000 odamdan 1 nafaridan kamrog‘ida namoyon bo‘ladi)
Agranulotsitoz (oq qon xujayralarining sonini keskin kamayishi, bu infektsiyalar rivojlanishi ehtimolini oshiradi). Agranulotsitoz nojo‘ya ta'sirlari paydo bo‘lmaganligi bilan avval metamizol bilan davolangan patsiyentlarda ham paydo bo‘lishi mumkin. Agranulotsitozni paydo bo‘lishi xavfi metamizolni uzoq muddatli (1 haftadan ortiq) qo‘llashda oshadi. Agranulotsitozning xarakterli belgilari teri va og‘iz, tomoq, jinsiy a'zolar shilliq qavatlarni yallig‘lanishi, tomoqda og‘riq va tana haroratini oshishini o‘z ichiga oladi. Umumiy holatni birdan yomonlashishi, tana haroratini pasaymasligi yoki uni qayta ko‘tarilishi, shilliq qavat va teri tomonidan og‘riqli o‘zgarishlar paydo bo‘lganida, Spazmalgon preparati bilan davolashni to‘xtatish va shifokorga murojaat qilish kerak.
Juda kam hollarda trombotsitopeniya (trombotsitlar sonini kamayishi, bu qon ketishlar yoki ko‘karishlarni paydo bo‘lishi xavfini oshiradi), gemolitik anemiya (qizil qon xujayralarini kamayishi, bu rangparlik yoki terini sarg‘ayishi, holsizlik yoki hansirashga olib keladi), aplastik anemiya (qon xujayralarining sonini keskin kamayishi, bu holsizlik, ko‘karishlarni paydo bo‘lishi yoki infektsiyalar rivojlanishi ehtimolini oshishiga olib keladi) ham kuzatilishi mumkin.
Analgetik astmasi bo‘lgan patsiyentlarda o‘ta yuqori sezuvchanlik reaktsiyalari astmatik huruj; Stivens-Djonson (xavfli ekssudativ eritema) yoki Layell (toksik epidermal nekroliz) sindromi; sirkulyator shok ko‘rinishida namoyon bo‘ladi.
Tez-tezligi noma'lum bo‘lgan:
Og‘izni qurishi, ko‘ngil aynishi, qorinda og‘riq va diskomfort hissi, gastrit va me'da yara kasalligini zo‘rayishi, ayrim hollarda ultseratsiyalar va qon ketishi, bosh aylanishi, bosh og‘rig‘i, ko‘rishni buzilishi, akkomodatsiyani buzilishi, siyishni qiyinlashishi.
Parenteral qo‘llanganda yuborish joyida og‘riq va mahalliy reaktsiyalar, juda kam hollarda hatto flebitlar paydo bo‘lishi mumkin.
O‘ta yuqori sezuvchanlik paydo bo‘lganida, buyrak yoki qon yaratish funktsiyasini buzilishlari bo‘lganida, Spazmalgon preparatini qo‘llash to‘xtatiladi.

Qo‘llash mumkin bo‘lmagan holatlar

- Spazmalgon preparatining faol moddalari yoki pirazolon hosilalari yoki nosteroid yallig‘lanishga qarshi dori vositalariga allergiya (o‘ta yuqori sezuvchanlik);
- og‘ir jigar va/yoki buyrak kasalligi bo‘lsa;
- ichak tutilishi va megakolon (yo‘g‘on ichakni kengayishi) hollarida;
- eritrotsitlar funktsiyasini buzilishi bilan bog‘liq jigar porfiriyasi yoki glyukozo-6-fosfat-degidrogenaza fermentining yetishmovchiligining nasliy kasalligi bo‘lsa;
- agar suyak ko‘migining funktsiyasini buzilishi (tsitostatiklar bilan davolanishdan keyin) yoki aplastik anemiya (qon xujayralarining sonini kamayishi, bu holsizlik, ko‘karishlarni paydo bo‘lishi yoki infektsiyalar rivojlanishi ehtimolini oshishiga olib keladi), agranulotsitoz (oq qon xujayralarining sonini keskin kamayishi, bu infektsiyalar rivojlanishi ehtimolini oshiradi) yoki leykopeniya (oq qon xujayralarining umumiy sonini kamayishi) kabi qon kasalliklari bo‘lsa;
- prostata bezining adenomasi;
- o‘t pufagi va qovuq atoniyasi;
- gipotoniya (past qon bosimi) yoki turg‘un bo‘lmagan qon aylanishi;
- homiladorlik va emizishda qo‘llash mumkin emas.
Ushbu dori preparatini 15 yoshdan kichik bolalarga buyurish mumkin emas.
Dorilarning o‘zaro ta'siri
Davolovchi shifokoringiz yoki farmatsevtga Siz hozir qabul qilayotgan yoki yaqinda qabul qilgan boshqa dori preparatlari, shu jumladan retseptsiz beriladigan dori preparatlari haqida xabar berishingizni so‘raymiz.
Markaziy nerv tizimini bostiruvchi, og‘riqni qoldiruvchi, yallig‘lanishga qarshi dori preparatlari, homiladorlikka qarshi dori preparatlari, kumarin antikoagulyantlari (qon ivishini pasaytiradi), xlorpromazin (ruhiy kasalliklarni davolash uchun), xloramfenikol (antibiotik), siklosporin (o‘sma kasalliklarida qo‘llaniladi), uxlatuvchi dori preparatlarini bir vaqtda qo‘llash davolashga ta'sir qilishi mumkin.
Spazmalgonni ovqat mahsulotlari va ichimliklar bilan birga qo‘llash
Spazmalgon bilan davolash vaqtida alkogolni iste'mol qilish tavsiya qilinmaydi, chunki dori preparatining nojo‘ya ta'sirlari kuchayishi mumkin.

Maxsus ko‘rsatmalar

Spazmalgon preparati bilan davolashni boshlashdan oldin, agar Sizda buyrak yoki jigar kasalliklari; ichak tutilishi yoki me'da-ichak yo‘llaridan ichidagisini qiyinchilik bilan o‘tishi (axalaziya, privratnik va o‘n ikki barmoq ichak yarasidagi stenoz); gastroezofageal reflyuks kasalligi, ichak atoniyasi, paralitik ileus; glaukoma (ko‘z ichki bosimini oshishi); miasteniya gravis (mushak kuchsizligi), yurak kasalliklari (aritmiyalar, yurak ishemik kasalligi, dimlangan yurak yetishmovchiligi) bo‘lsa, shifokorga xabar bering.
Spazmalgon preparati bilan davolanish vaqtida og‘ir o‘ta yuqori sezuvchanlik reaktsiyalari, shu jumladan anafilaktik reaktsiyalarni rivojlanish xavfi mavjud. O‘ta yuqori sezuvchanlikning birinchi simptomlari paydo bo‘lganida preparatni yuborish darhol to‘xtatilsin va ushbu holatni bartaraf qilish uchun shoshilinch choralar (adrenalin, glyukokortikoidlar, antigistamin vositalari) ko‘rilsin.
Metamizolga bo‘lishi mumkin bo‘lgan o‘ta yuqori sezuvchanlikning og‘ir reaktsiyalari yuzaga kelishi xavfi quyidagi hollarda oshadi: analgetik astmasi; bronxial astma, ayniqsa, agar rinosinusit (burun va burun bo‘shliqlarini yallig‘lanishi) yoki burunda poliplari; surunkali eshakemi bo‘lgan patsiyentlarda; bo‘yovchilar (masalan, tartrazin) yoki konservantlarga (benzoatlarga) o‘ta yuqori sezuvchanligi bo‘lgan patsiyentlarda; alkogolni o‘zlashtiraolmasligi bo‘lgan patsiyentlarda. Bunday patsiyentlar hattoki alkogolning ko‘p bo‘lmagan miqdoriga aksirish, ko‘z yoshini oqishi va yuzni kuchli qizarishi paydo bo‘lishi bilan reaktsiya beradilar. Bunday alkogolni o‘zlashtiraolmaslik tashhislanmagan analgetik astmaning belgisi bo‘lishi mumkin.
Metamizol saqlovchi dori vositalari bilan davolashda shok (tsirkulyator kollaps) va agranulotsitoz (oq qon xujayralarining sonini keskin kamayishi, bu infektsiyalar rivojlanishi ehtimolini oshiradi) paydo bo‘lishini xavfi mavjud. Ular dozaga bog‘liq emas va ularni oldindan bilish mumkin emas.
Qon kasalliklari bo‘lgan yoki anamnezida shunday kasalliklari bo‘lgan patsiyentlarda Spazmalgon preparati qo‘llanganda, davolash vaqtida qon manzarasini nazorat qilish kerak.
Spazmalgon in'ektsiya uchun eritmasi qon bosimini pasayishini chaqirishi mumkin. Bunday reaktsiyani, ayniqsa qon bosimi past yoki suyuqlik yo‘qotgan, qon aylanishini buzilishi yoki boshlang‘ich sirkulyator kollaps (masalan, infarkt yoki og‘ir jarohatlari bo‘lgan patsiyentlar), tana harorati yuqori bo‘lgan patsiyentlarda paydo bo‘lishini xavfi oshadi. Bunday patsiyentlarga Spazmalgon preparatini mushak ichiga yuborishni gorizontal (yotgan) holatda va qon bosimi, yurak qisqarishlari va nafas tez-tezligini doimiy nazorati ostida amalga oshirish kerak.
Homiladorlik va emizish davri
Har qanday dori preparatini qabul qilishdan avval davolovchi shifokor yoki farmatsevt bilan maslahatlashing.
Homiladorlik vaqtida Spazmalgonni qo‘llash mumkin emas.
Agar emizikli onalarni preparat bilan davolashning zarurati bo‘lsa, emizishni to‘xtatish kerak.
Transport vositasini yoki potentsial xavfli mexanizmlarni boshqarish qobiliyatiga dori vositasining ta'sirining o‘ziga xosligi
Spazmalgon dori preparati bosh aylanishi, ko‘rishni buzilishi, shuningdek diqqatga noxush ta'sir qilishi va kutilmagan vaziyatlarda reaktsiyani buzilishini chaqirishi mumkin. Shuning uchun ushbu preparat bilan davolanishda transport vositalarini boshqarish va mashinalar bilan ishlashdan saqlanish kerak.
Preparat bolalar ololmaydigan joyda saqlansin va yaroqlilik muddati o‘tgach ishlatilmasin.

Dozani oshirib yuborilishi

Simptomlari: ko‘ngil aynishi, qusish, menersimon ko‘rinishlar, quloqlarni shang‘illashi, shok, o‘tkir buyrak va jigar yetishmovchiligi, tirishishlar.
Davolash: simptomatik davolash tibbiy muassasada o‘tkaziladi.
Sovuq ter, bosh aylanishi, ko‘ngil aynishi, qusish, terining rangini o‘zgarishi va bo‘g‘ilish kabi belgilar paydo bo‘lganida shifokorga murojaat qilish kerak.

Chiqarilish shakli

Tiniq, deyarli zarrachalar saqlamaydigan och-sariq rangli suyuqlik, ochish uchun belgisi – rangli nuqtasi bo‘lgan jigarrang shisha ampulalarda.
2 ml in'ektsiya uchun eritma ampulalar
5 yoki 10 ampuladan PVX plyonkali blisterda, 1 blisterdan qo‘llash bo‘yicha yo‘riqnoma bilan karton qutida.
5 ml in'ektsiya uchun eritma ampulalar
5 yoki 10 ampuladan PVX plyonkali blisterda, 1 blisterdan qo‘llash bo‘yicha yo‘riqnoma bilan karton qutida.

Saqlash sharoiti

Original o‘ramida, yorug‘likdan himoyalangan joyda, 25°S dan yuqori bo‘lmagan haroratda.
Muzlatilmasin!
Yaroqlilik muddati ko‘rsatilgan oyning oxirgi kuniga to‘g‘ri keladi.

Yaroqlilik muddati

4 yil.

Dorixonalardan berish tartibi

Shifokor retsepti bo‘yicha.

Ishlab chiqaruvchi

SOFARMA AJ, Bolgariya
1220 Sofiya, Iliyenskoye shosse ko‘ch., 16.