Nimid tab. №10

Tavsif

Preparatning savdo nomi

Nimid
Ta'sir etuvchi modda (XPN): nimesulid

Dori shakli

tabletkalar

Tarkibi

Har bir tabletka quyidagilarni saqlaydi:
faol modda: nimesulid 100 mg;
yordamchi moddalar: mikrokristalli sellyuloza, natriy kroskarmellozasi, magniy stearati, kolloid kremniy dioksidi.

Ta'rifi

och sariq rangli, ikki tomoni silliq, dumaloq tabletkalar.

Farmakoterapevtik guruhi

Boshqa nosteroid, yallig‘lanishga qarshi va revmatizmga qarshi vositalar.
ATK kodi: M01AX17

Farmakologik xususiyatlari

Farmakodinamika

Nimesulid – og‘riq qoldiruvchi va isitmani tushiruvchi xususiyatlarga ega bo‘lgan nosteroid yallig‘lanishga qarshi preparat bo‘lib, prostaglandinlar sintezining fermenti – siklooksigenazaning ingibitori sifatida ta'sir qiladi.

Farmakokinetikasi

Nimesulid peroral qabul qilinganda yaxshi so‘riladi. 100 mg nimesulidni bir marta qabul qilgandan keyin, 2-3 soat o‘tgach kattalarda plazmadagi eng yuqori miqdori 3-4 mg/l ga erishiladi. AUC = 20-35 mg s/l. Ushbu ko‘rsatkichlar va 7 kun davomida kuniga ikki marta 100 mg qabul qilgandan keyin kuzatilgan raqamlar o‘rtasida statistik jihatdan muhim farq topilmadi.
97,5% gacha plazma oqsillari bilan bog‘lanadi.
Nimesulid jigarda bir necha yo‘llar bilan, shu jumladan, R450 (CYP) 2C9 sitoxrom izofermentlari orqali jadal metabolizlanadi. Shunday qilib, CYP2C9 tomonidan metabolizlanadigan preparatlarni bir vaqtning o‘zida qabul qilish paytida dorilar o‘zaro ta'sirining ehtimoli bor ("Dori vositalarining o‘zaro ta'siri" bo‘limiga qarang). Asosiy metaboliti – paragidroksi hosila bo‘lib, u shuningdek farmakologik jihatdan faol metabolit hisoblanadi. Ushbu metabolitning qon oqimida paydo bo‘lishidan oldin kechikish vaqti qisqa (taxminan 0,8 soat), lekin uning hosil bo‘lish konstantasi yuqori emas va nimesulidning so‘rilish konstantasidan sezilarli darajada past. Gidroksinimesulid plazmadagi yagona metabolit bo‘lib, u deyarli to‘liq kon'yugatsiyalangan. T½ - 3,2 dan 6 soatgacha.
Nimesulid asosan siydik bilan chiqariladi (qabul qilingan dozaning taxminan 50%).
Faqat 1-3% modifikatsiyalanmagan birikma sifatida chiqariladi. Asosiy metabolit bo‘lgan gidroksinimesulid faqat glyukuronat shaklida uchraydi. Dozaning taxminan 29% metabolizmdan keyin najas bilan chiqariladi.
Nimesulidning kinetik profili keksa odamlarda bir marta va takroriy qo‘llashdan keyin o‘zgarmaydi.
Yengil va o‘rta darajali buyrak yetishmovchiligi (kreatinin klirensi 30-80 ml/daq) bo‘lgan bemorlarda o‘tkazilgan o‘tkir eksperimental tadqiqotda, nimesulid va uning asosiy metabolitining qon plazmasidagi eng yuqori miqdorlari sog‘lom ko‘ngillilarga qaraganda yuqori bo‘lmagan. AUC va T½ beta 50% ga yuqori, lekin har doim sog‘lom ko‘ngillilarda nimesulidni qo‘llashda kuzatilgan kinetik qiymatlar oralig‘ida bo‘lgan. Qayta qo‘llash kumulyatsiyaga olib kelmaydi.
Nimesulid jigar yetishmovchiligi bo‘lgan bemorlarda qarshi ko‘rsatilgan ("Qo‘llash mumkin bo‘lmagan holatlar" bo‘limiga qarang).

Qo‘llanilishi

O‘tkir og‘riqni davolash ("Qo‘llash usuli va dozalari" bo‘limiga qarang).
Birlamchi dismenoreya.
Nimesulid faqat ikkinchi darajali davolash sifatida buyurilishi kerak. Nimesulidni buyurish to‘g‘risidagi qaror har bir alohida bemor uchun umumiy xavflarni baholashga asoslanishi lozim ("Qo‘llash mumkin bo‘lmagan holatlar" va "Maxsus ko‘rsatmalar" bo‘limlariga qarang).

Qo‘llash usuli va dozalari

Nimid® 100 mg tabletkalarini klinik ko‘rsatmalarga muvofiq imkon qadar qisqa muddat davomida qo‘llash kerak.
Bundan tashqari, simptomlarni nazorat qilish uchun zarur bo‘lgan eng qisqa vaqt ichida eng kam samarali dozani qo‘llash orqali nojo‘ya ta'sirlarni kamaytirish mumkin ("Maxsus ko‘rsatmalar" bo‘limiga qarang).
Nimesulid bilan davolash siklining maksimal davomiyligi 15 kunni tashkil qiladi.
Kattalar
100 mg dan ovqatdan keyin kuniga ikki marta.
Keksa yoshdagi bemorlar
Keksa bemorlar uchun sutkalik dozani kamaytirishning hojati yo‘q ("Farmakokinetika" bo‘limiga qarang).
12 yoshgacha bo‘lgan bolalar
Nimid 100 mg tabletkalari bunday bemorlarda qarshi ko‘rsatilgan (shuningdek, "Qo‘llash mumkin bo‘lmagan holatlar" bo‘limiga qarang).
O‘smirlar (12 yoshdan 18 yoshgacha)
Kattalardagi nimesulidning kinetik profili va farmakodinamik xususiyatlariga asosan, bunday bemorlarda dozani korrektsiyalash talab etilmaydi.
Buyrak yetishmovchiligi
Farmakokinetikani hisobga olgan holda, yengil va o‘rta darajali buyrak yetishmovchiligi bo‘lgan bemorlarda (kreatinin klirensi 30-80 ml/daq) dozani korrektsiyalashning hojati yo‘q. Nimid® 100 mg tabletkalari buyrak yetishmovchiligida qarshi ko‘rsatilgan (kreatinin klirensi <30 ml/daq) ("Qo‘llash mumkin bo‘lmagan holatlar" va "Farmakokinetika" bo‘limlariga qarang).
Jigar yetishmovchiligi
Nimid 100 mg tabletkalarini jigar yetishmovchiligi bo‘lgan bemorlarda qo‘llash qarshi ko‘rsatilgan ("Qo‘llash mumkin bo‘lmagan holatlar" va "Farmakokinetika" bo‘limlariga qarang).

Qo‘llash mumkin bo‘lmagan holatlar

Nimesulidga yoki har qanday yordamchi moddalarga yuqori sezuvchanlik.
- Anamnezda asetilsalitsil kislotasiga yoki boshqa nosteroid yallig‘lanishga qarshi preparatlarga o‘ta yuqori sezuvchanlik reaktsiyalari (masalan, bronxospazm, rinit, eshakemi, burun poliplari).
- Nimesulidga nisbatan oldingi gepatotoksik reaktsiyalar.
- Boshqa potentsial gepatotoksik moddalar bilan bir vaqtning o‘zida ta'sir qilishi.
- Alkogolizm, giyohvandlik.
- NYaQV bilan oldingi davolashga bog‘liq bo‘lgan Me'da-ichakdan qon ketishi yoki teshilishi.
- Qaytalanuvchi faol qon ketishi/peptik yara yoki anamnezda shunga o‘xshash holatlarning bemorda mavjudligi (tasdiqlangan yara yoki qon ketishining ikki yoki undan ortiq aniq epizodlari).
- Serebrovaskulyar yoki boshqa faol qon ketishi.
- Qon ivishining og‘ir buzilishlari.
- Og‘ir yurak yetishmovchiligi.
- Og‘ir buyrak yetishmovchiligi.
- Jigar yetishmovchiligi.
- Isitmalash va/yoki grippga o‘xshash alomatlari bo‘lgan bemorlar.
- 12 yoshgacha bo‘lgan bolalar.
- Homiladorlikning uchinchi trimestri va laktatsiya davri ("Homiladorlik va laktatsiya davrida qo‘llanilishi" bo‘limiga qarang).
Dorilarning o‘zaro ta'siri
Farmakodinamik o‘zaro ta'sirlari
Boshqa nosteroid yallig‘lanishga qarshi vositalar (NYaQV)
Nimid 100 mg tabletkalarini ("Maxsus ko‘rsatmalar" bo‘limiga qarang) yallig‘lanishga qarshi dozalarda (1 g bir marta yoki 3 g kun davomida) buyurilgan boshqa nosteroid yallig‘lanishga qarshi vositalar, shu jumladan, asetilsalitsil kislotasi bilan bir vaqtda qo‘llash tavsiya etilmaydi.
Kortikosteroidlar
Me'da-ichak yo‘lidan qon ketishi yoki yaralar paydo bo‘lish xavfining oshishi ("Maxsus ko‘rsatmalar" bo‘limiga qarang).
Antikoagulyantlar
NYaQV lar varfarin kabi antikoagulyantlarning ta'sirini kuchaytirishi mumkin ("Maxsus ko‘rsatmalar" bo‘limiga qarang). Varfarin yoki shunga o‘xshash antikoagulyantlarni qabul qilayotgan bemorlarda Nimid 100 mg tabletkalari bilan davolashda qon ketishning xavfi yanada yuqori. Shuning uchun, kombinatsiyalangan qo‘llanilishi tavsiya etilmaydi (shuningdek, "Maxsus ko‘rsatmalar" bo‘limiga qarang) va qon ivishining og‘ir buzilishlari bo‘lgan bemorlarda qarshi ko‘rsatilgan (shuningdek, "Qo‘llash mumkin bo‘lmagan holatlar" bo‘limiga qarang). Agar kombinatsiyalangan qo‘llanishdan saqlanishning iloji bo‘lmasa, antikoagulyant faollikni diqqat bilan kuzatib borish kerak.
Trombotsitlar ingibitorlari va serotoninni qayta qamrab olinishining selektiv ingibitorlari (SQQSI): Me'da-ichakdan qon ketishning yuqori xavfi ("Maxsus ko‘rsatmalar" bo‘limiga qarang).
Diuretiklar, angiotenzinga aylantiruvchi ferment (AAF) ingibitorlari va angiotenzin II retseptorlari antagonistlari (AIIRA): NYaQV lar diuretiklar va boshqa antigipertenziv preparatlarning ta'sirini pasaytirishi mumkin. Buyrak funktsiyasi buzilgan ba'zi bemorlarda (masalan, suvsizlanishi bo‘lgan bemorlarda yoki buyrak funktsiyasi susaygan keksa bemorlarda) AAF ingibitori va siklooksigenaza ingibitorlarini bir vaqtda qo‘llash buyrak yetishmovchiligini kuchaytirishi mumkin, shu jumladan, odatda qaytadigan xarakterga ega bo‘lgan o‘tkir buyrak yetishmovchiligining rivojlanish ehtimoli bilan.
Ushbu o‘zaro ta'sirlarni Nimid 100 mg tabletkalarini AAF yoki AIIRA ingibitorlari bilan birgalikda qabul qilish kerak bo‘lgan bemorlarda hisobga olish kerak. Shu sababli, ushbu preparatlar kombinatsiyasini tayinlash, ayniqsa qari odamlarda ehtiyotkorlik bilan amalga oshirilishi lozim. Bemorlar suyuqlikni yetarli darajada qabul qilishlari shart, shuningdek, bir vaqtda davolash boshlanganidan keyin buyrak funktsiyasini muntazam ravishda kuzatib borish imkoniyatini ko‘rib chiqish darkor.
Farmakokinetik o‘zaro ta'sirlar: nimesulidning boshqa preparatlarning farmakokinetikasiga ta'siri
Furosemid
Sog‘lom odamlarda nimesulid furosemidning natriy chiqarilishiga, va kamroq darajada kaliy chiqarilishiga ta'sirini vaqtincha kamaytiradi, shuningdek, diuretik reaktsiyani kamaytiradi.
Furosemid va nimesulidni bir vaqtda qo‘llash AUC ning pasayishiga (taxminan 20%) va furosemidning buyrak klirensini buzmasdan to‘liq chiqarilishiga olib keladi.
Furosemid va Nimid 100 mg tabletkalarini bir vaqtda qo‘llash, "Maxsus ko‘rsatmalar" bo‘limida ta'riflanganidek, buyrak yoki yurak kasalligi bo‘lgan bemorlarda ehtiyotkorlikka amal qilishni talab qiladi.
Litiy
Yallig‘lanishga qarshi nosteroid vositalar litiy klirensini pasaytiradi, bu esa uning plazmadagi kontsentratsiyasining oshishiga va litiyning toktsikligiga olib keladi. Agar Nimid 100 mg tabletkalari litiyni qabul qilayotgan bemorga buyurilgan bo‘lsa, litiy miqdorini diqqat bilan kuzatib borish lozim.
Glibenklamid, teofillin, varfarin, digoksin, simetidin va antatsid preparati (alyuminiy va magniy gidroksidi kombinatsiyasi) bilan potentsial farmakokinetik o‘zaro ta'sirlar ham in vivo sharoitida tekshirilgan. Klinik jihatdan ahamiyatli o‘zaro ta'sirlar qayd etilmagan.
Nimesulid CYP2C9 ni ingibirlaydi. Nimid 100 mg tabletkalari bilan bir vaqtda qo‘llanganda, ushbu ferment tomonidan metabolizlanadigan preparatlarning plazmadagi kontsentratsiyalari oshishi mumkin.
Nimesulidni metotreksat bilan davolashdan 24 soat oldin yoki undan keyin qabul qilganda ehtiyot bo‘lish kerak, chunki qon zardobida metotreksat kontsentratsiyasi oshishi va natijada ushbu preparatning toktsikligi yuqori bo‘lishi mumkin.
Buyrak prostaglandinlariga ta'sirini hisobga olgan holda, prostaglandinsintetaza ingibitorlari, masalan, nimesulid, siklosporinlarning nefrotoktsikligini oshirishi mumkin.
Farmakokinetik o‘zaro ta'sirlar: boshqa preparatlarning nimesulid farmakokinetikasiga ta'siri
In vitro tadqiqotlari shuni ko‘rsatdiki, tolbutamid, salitsil kislotasi va valproik kislotasi nimesulidni bog‘lanish joylaridan siqib chiqaradi. Biroq, nimesulidning plazma kontsentratsiyasiga mumkin bo‘lgan ta'siriga qaramay, bu o‘zaro ta'sirlar klinik jihatdan ahamiyatli bo‘lmagan.
Dozaning oshirib yuborilishi
NYaQV lar dozasining o‘tkir oshirib yuborilishidan keyingi belgilar odatda apatiya, uyquchanlik, ko‘ngil aynishi, qusish va epigastral sohadagi og‘riqlar bilan chegaralanadi, ular odatda quvvatlovchi davolash o‘tkazilganda qaytadi. Me'da-ichakdan qon ketishlari rivojlanishi mumkin. Gipertoniya, o‘tkir buyrak yetishmovchiligi, nafasning siqilishi va koma vujudga kelishi mumkin, ammo ular kam kuzatiladi. NYaQV lar dozasini oshirib yuborish natijasida anafilaktoid reaktsiyalar ro‘y berishi mumkinligi haqida xabar berilgan.
NYaQV lar dozasi oshirib yuborilganidan keyin bemorlarda simptomatik va quvvatlovchi davolashni o‘tkazish lozim. Maxsus antidotlar yo‘q. Nimesulidning gemodializ yordamida chiqarilishi haqida ma'lumot yo‘q, ammo plazma oqsillari bilan yuqori darajada bog‘lanishi (97,5% gacha) tufayli dializning dozani oshirib yuborishda samarali bo‘lishi ehtimoldan uzoq. Kusish va/yoki faollashtirilgan ko‘mir (kattalar uchun 60 dan 100 g gacha) va/yoki osmotik surgi vositalari belgilari kuzatilgan bemorlarda yoki dozani oshirib yuborishdan keyin 4 soat davomida ko‘rsatilishi mumkin. Tezlashtirilgan diurez, siydikning ishqorlanishi, gemodializ yoki gemoperfuziya, oqsillar bilan yuqori darajada bog‘langanligi sababli samarali emas. Buyraklar va jigar funktsiyasini nazorat qilish zarur.

Chiqarilish shakli

10 tadan tabletka blisterda.
1 tadan yoki 10 tadan blister tibbiyotda qo‘llanilishiga doir yo‘riqnomasi bilan birga karton o‘ramda.
Har bir blister tibbiyotda qo‘llanilishiga doir yo‘riqnomasi bilan birga kartonli monoo‘ramda.
10 tadan shunday kartonli monoo‘ram ikkilamchi karton o‘ramda.

Saqlash sharoiti

Quruq, yorug‘likdan himoyalangan joyda 25°S dan yuqori bo‘lmagan haroratda saqlansin.
Bolalar ololmaydigan joyda saqlansin.

Yaroqlilik muddati

4 yil.
Yaroqlilik muddati o‘tgach qo‘llanilmasin.

Dorixonalardan berish tartibi

Retsept bo‘yicha

Ishlab chiqaruvchi

Kusum Healthcare Pvt. Ltd.
Ishlab chiqarish manzili
SP-289(A), RIICO Industrial Area, Chopanki, Bhiwadi, Dist. Alwar (Rajasthan), Hindiston