Elfunat in'ektsiya eritmasi ampula 50 mg/ml 2 ml №10

Preparatning savdo nomi

Elfunat
Ta'sir etuvchi modda (XPN) etilmetilgidroksipiridin suktsinat

Dori shakli

venaga va mushak ichiga yuborish uchun eritma

Tarkibi

1 ml preparat quyidagilarni saqlaydi
faol modda 50 mg etilmetilgidroksipiridin suktsinati;
yordamchi modda in'ektsiya uchun suv.
Ta'rifi tiniq rangsiz yoki sarg‘ish rangli eritma

Farmakoterapevtik guruhi

antioksidant vosita.

ATS kodi

N07XX

Farmakologik xususiyatlari

Farmakodinamika

Elfunat antioksidant, gipoksiyaga qarshi, membranoprotektor, nootrop, tirishishga qarshi, anksiolitik va gipolipidemik ta'sir ko‘rsatadi. Organizmni stressga hamda shok, gipoksiya, ishemiya, bosh miyada qon aylanishini buzilishi, alkogol va antipsixotik preparatlar (neyroleptiklar) bilan zaharlanish kabi turli zararli omillarning ta'siriga nisbatan chidamliligini oshiradi.
Bosh miyaning metabolizmi va qon bilan ta'minlanishini yaxshilaydi. Qon xujayralarining membrana tuzilmalarini barqarorlashtirib, gemolizdan saqlaydi. Gipolipidemik ta'sirga ega, umumiy xolesterin va past zichlikdagi lipoproteidlarning darajasini pasaytiradi. O‘tkir pankreatitda fermentativ toksemiya va endogen intoksikatsiyani kamaytiradi.
Preparatning ta'sir mexanizmi uning antioksidantlik va membranaprotektor faolligi bilan ifodalanadi. Lipidlarning peroksidli oksidlanish jarayonlarini ingibitsiya qiladi, superoksidazaning faolligini oshiradi, lipid-oqsil nisbatini ko‘paytiradi, xujayra membranasining strukturasi va faoliyatini yaxshilaydi. Hujayra membranasiga bog‘langan fermentlar (kalьtsiyga bog‘liq bo‘lmagan fosfodiesteraza, adenilattsiklaza, atsetilxolinesteraza), retseptor komplekslari (benzodiazepin, gamma-aminomoy kislotasi, atsetilxolin komplekslari) ning faolligini modullaydi, bu ularning ligandalar bilan bog‘lanish xususiyatini kuchaytiradi, biomembranalarning struktur-funktsional tuzilmasini tiklanishiga yordam beradi, natijada neyromediatorlarni tashilishi, va muvofiq ravishda, sinapslar orqali o‘tkazilishi yaxshilanadi.
Elfunat bosh miyada dofaminning kontsentratsiyasini oshiradi. Aerob glikolizning kompensator faollashuvini kuchaytiradi va gipoksiya sharoitida Krebs siklidagi oksidlanish jarayonlarining susayish darajasini pasaytirib, adenozintrifosfat va kreatinfosfatni oshiradi, mitoxondriylarning energiya sintezlovchi faoliyatini, xujayra membranalarining barqarorlashishini faollashtiradi. Elfunat ishemiyaga uchragan miokardda metabolik jarayonlarni normallashtiradi, nekrozga uchragan sohani kichraytiradi, ishemiya sohasida miokardning elektr faolligi hamda qisqaruvchanligini tiklaydi va yaxshilaydi, shuningdek o‘tkir koronar yetishmovchiligida reperfuziya sindromining oqibatlarini kamaytiradi. Nitropreparatlarning antianginal faolligini oshiradi. Surunkali ishemiya va gipoksiya sababli rivojlangan avj olib boruvchi neyropatiyada to‘r pardaning ganglioz xujayralari hamda ko‘ruv nervi tolalarini saqlanib qolishiga yordam beradi. To‘r parda va ko‘ruv nervining funktsional faolligini yaxshilab, ko‘rish o‘tkirligini oshiradi.

Farmakokinetikasi

Mushak ichiga yuborilganida qon plazmasida yuborilgandan so‘ng 4 soat davomida aniqlanadi. Qon zardobidagi maksimal kontsentratsiyasiga erishish vaqti 0,45-0,50 soatni tashkil etadi. 400-500 mg dozalarda yuborilganida maksimal kontsentratsiyasi 3,5-4,0 mkg/ml ni tashkil etadi.
Qon hafzasidan a'zo va to‘qimalarga jadal o‘tadi va organizmdan tezda chiqariladi. Organizmda preparatni o‘rtacha ushlanib turish vaqti 0,7-1,3 soatni tashkil qiladi.
Organizmdan siydik bilan, asosan glyukuron kon'yugatlari shaklida hamda oz miqdorlarda – o‘zgarmagan holda chiqariladi.

Qo‘llanilishi

-bosh miyada qon aylanishini o‘tkir buzilishlari;
-bosh miya jarohatlari, bosh miya jarohatlarining asoratlari;
-distsirkulyator entsefalopatiya;
-vegeto-tomir (neyrotsirkulyator) distoniyasi;
-bosh miya faoliyatini ateroskleroz tufayli buzilishlari (engil kognitiv buzilishlar);
-nevroz va nevrozsimon holatlarda xavotirli buzilishlar;
-o‘tkir miokard infarkti (dastlabki sutkalarda) majmuaviy davolash tarkibida;
-klinik manzarasida nevroz va vegeto-tomir buzilishlarining ustunligi bilan kechuvchi alkogolizmda abstinent sindrom;
-neyroleptiklar bilan o‘tkir zaharlanish;
-qorin bo‘shlig‘ini o‘tkir yiringli-yallig‘lanish jarayonlarida (o‘tkir nekrotik pankreatit, peritonit) kompleks davolash tarkibida;
-birlamchi ochiq burchakli glaukomaning turli bosqichlarini kompleks davolash tarkibida qo‘llanadi.

Qo‘llash usuli va dozalari

Elfunat mushak ichiga yoki venaga ichiga yuborish (oqim bilan yoki tomchilab) uchun qo‘llanadi. Infuziya yo‘li bilan yuborilganida preparatni 0,9% li natriy xlorid eritmasida suyultirish lozim.
Preparat oqim bilan sekin 5-7 minut davomida, tomchilab yuborilganda – minutiga 40-60 tomchi tezlik bilan yuboriladi. Maksimal sutkalik dozasi 1200 mg dan oshmasligi kerak.
Bosh miyada qon aylanishini o‘tkir buzilishlarida – dastlabki 10-14 kun davomida 200-500 mg dan sutkada 2-4 marta vena ichiga tomchilab, so‘ngra – mushak ichiga 200-250 mg dan sutkada 2-3 marta 2 hafta mobaynida yuboriladi.
Bosh miya jarohatlarida va bosh miya jarohatlarining asoratlarida – 200-500 mg dan sutkada 2-4 marta 10-15 kun davomida vena ichiga tomchilab yuboriladi.
Distsirkulyator entsefalopatiyaning dekompensatsiya bosqichida – 200-500 mg dan sutkada 1-2 marta 14 kun davomida vena ichiga oqim bilan yoki tomchilab, so‘ngra esa – mushak ichiga sutkasiga 100-250 mg dan navbatdagi 2 hafta davomida yuboriladi.
Distsirkulyator entsefalopatiyaning kursli profilaktikasi uchun – 200-250 mg dan sutkada 2 marta 10-14 kun davomida mushak ichiga yuboriladi.
Vegeto-tomir distoniyasida va nevroz hamda nevrozsimon holatlardagi xavotirli buzilishlarda – mushak ichiga sutkasiga 50-400 mg dan 14 kun davomida yuboriladi.
Yengil kognitiv buzilishlarda – mushak ichiga sutkasiga 100-300 mg dan 14-30 kun davomida yuboriladi.
O‘tkir miokard infarktida majmuaviy davolash tarkibida miokard infarktini, nitratlar, beta-adrenoblokatorlar, angiotenzinga aylantiruvchi ferment ingibitorlari, trombolitiklar, antikoagulyantlar va antiagregant vositalar, shuningdek ko‘rsatmalarga qarab simptomatik vositalarni o‘z ichiga oluvchi an'anaviy davolash fonida Elfunat preparatini vena ichiga yoki mushak ichiga 14 sutka davomida yuboriladi. Dastlabki 5 sutka davomida, maksimal samaraga erishish uchun, preparatni vena ichiga yuborgan afzal, navbatdagi 9 sutka davomida mushak ichiga yuborish mumkin.
Preparatni vena ichiga yuborish (nojo‘ya samaralardan saqlanish maqsadida) 0,9% li natriy xlorid eritmasi yoki 5% li dekstroza (glyukoza) eritmasining 100-150 ml hajmda suyultirib, sekin 30-90 minut davomida tomchilab infuziya yo‘li bilan amalga oshiriladi. Zarurat bo‘lganida preparatni kamida 5 minut davomida oqim bilan sekin yuborish ham mumkin.
Preparatni sutkada 3 marta, har 8 soatda (vena ichiga yoki mushak ichiga) yuboriladi. Sutkalik terapevtik dozasi sutkada tana vazniga 6-9 mg/kg, bir martalik dozasi tana vazniga 2-3 mg/kg tashkil etadi. Maksimal sutkalik dozasi 800 mg dan, bir martalik dozasi – 250 mg dan oshmasligi kerak.
Alkogolli abstinentsiya sindromida – 200-500 mg dan sutkada 2-3 marta 5-7 kun davomida vena ichiga tomchilab yoki mushak ichiga yuboriladi.
Antipsixotik vositalar bilan o‘tkir zaxarlanishlarda – vena ichiga sutkasiga 200-500 mg dan 7-14 kun davomida yuboriladi.
Qorin bo‘shlig‘idagi o‘tkir yiringli-yallig‘lanish jarayonlarida (o‘tkir nekrotik pankreatit, peritonit) dastlabki sutkalarda preparatni ham operatsiyadan oldin, ham operatsiyadan keyingi davrda buyuriladi. Yuboriladigan dozalari kasallikni turi va og‘irligiga, jarayonni tarqalganligiga, klinik kechishiga bog‘liq bo‘ladi. Preparatni, barqaror ijobiy klinik-laborator samaraga erishilganidan so‘ng, asta-sekin bekor qilish mumkin.
O‘tkir shishli (interstitsial) pankreatitda – 200-500 mg dan sutkada 3 marta vena ichiga tomchilab (0,9% natriy xlorid eritmasida) va mushak ichiga yuboriladi.
Yengil darajadagi nekrotik pankreatitda – 100-200 mg dan sutkada 3 marta vena ichiga tomchilab (0,9% natriy xlorid eritmasida) va mushak ichiga yuboriladi.
O‘rtacha darajadagi nekrotik pankreatitda – 200 mg dan sutkada 3 marta vena ichiga tomchilab (0,9% natriy xlorid eritmasida) yuboriladi.
Og‘ir darajadagi nekrotik pankreatitda – dastlabki sutkalarda 800 mg dozada vena ichiga tomchilab, ikki marta yuborish rejimida; so‘ngra – 200-500 mg dan sutkada 2 marta sutkalik dozasini asta-sekin pasaytirish yo‘li bilan yuboriladi.
Juda og‘ir darajadagi nekrotik pankreatitda pankreatogen shokning alomatlarini barqaror darajagacha bartaraf etilguniga qadar boshlang‘ich dozasi sutkada 800 mg ni tashkil etadi, bemorning holati barqarorlashgach –300-500 mg dan sutkada 2 marta vena ichiga (0,9% li natriy xlorid eritmasida) tomchilab, sutkalik dozasini asta-sekin pasaytirish yo‘li bilan yuboriladi.
Ochiq burchakli glaukomaning turli bosqichlarida kompleks davolash tarkibida – mushak ichiga 100-300 mg dan sutkada 1-3 marta 14 kun davomida yuboriladi.
Nojo‘ya ta'sirlari
Nojo‘ya samaralarni uchrash tezligini quyida keltirilgan ko‘rsatkichlari quyidagi tarzda aniqlangan uchrash tezligi noma'lum – mavjud bo‘lgan ma'lumotlar bo‘yicha uchrash tezligi ko‘rsatkichlari baholash mumkin emas.
Ovqat hazm qilish tizimi tomonidan uchrash tezligi noma'lum – ko‘ngil aynishi, og‘izni qurishi.
Boshqalar uchrash tezligi noma'lum – allergik reaktsiyalar, uyquchanlik, uyquga ketish jarayonini buzilishi, bosh og‘rishi, arterial bosim (AB) ni oshishi yoki pasayishi.

Qo‘llash mumkin bo‘lmagan holatlar

-o‘ta yuqori sezuvchanlik;
-o‘tkir jigar va/yoki buyrak yetishmovchiligi;
-bolalar va 18 yoshgacha bo‘lgan o‘smirlar;
-homiladorlik;
-laktatsiya davrida qo‘llash mumkin emas.
Dorilarning o‘zaro ta'siri
Preparat benzodiazepin anksiolitiklari, tutqanoqqa qarshi vositalar (karbamazepin), parkinsonizmga qarshi vositalar (levodopa) nitratlarning ta'sirini kuchaytiradi. Etil spirtining toksik samaralarini kamaytiradi.

Maxsus ko‘rsatmalar

Ayrim hollarda, ayniqsa bronxial astmaga moyilligi bo‘lgan patsiyentlarda sulьfitlarga sezuvchanlik yuqori bo‘lganida, og‘ir darajadagi o‘ta yuqori sezuvchanlik reaktsiyalari rivojlanishi mumkin.
Arterial bosimi (AB) 180/100 mm sim. ust. dan yuqori, gipertonik kriz bilan kechuvchi arterial gipertenziya va yaqqol affektiv beqarorligi bo‘lgan patsiyentlarga, davolanish vaqtida AB ni sinchiklab nazorat qilish talab etiladi.
Homiladorlik va laktatsiya davrida qo‘llanishi
Homiladorlik va emizish davrida preparatni qo‘llashga oid ma'lumotlar mavjud emas.
Pediatriyada qo‘llanishi
18 yoshgacha bo‘lgan bolalar va o‘smirlarda preparatni qo‘llash samaradorligi va havfsizligi aniqlanmagan.
Avtotransportni haydash va mexanizmlarni boshqarish qobiliyatiga ta'siri
Davolanish vaqtida avtotransportni boshqarishda hamda diqqatni yuqori darajada jamlash va psixomotor reaktsiyalar tezligini talab etuvchi boshqa potentsial havfli faoliyat turlarini bajarishda ehtiyotkorlikka rioya qilish kerak.
Preparatni bolalar ololmaydigan joyda saqlash kerak va yaroqlilik muddati tugaganidan so‘ng ishlatilmasin.
Dozaning oshirib yuborilishi
Simptomlar uyquni buzilishi (uyqusizlik, ayrim hollarda - uyquchanlik); arterial bosimni biroz va qisqa muddatli (1,5-2 soatgacha) oshishi bo‘lishi mumkin.
Davolash odatda, talab etilmaydi – simptomlari sutka davomida o‘z-o‘zidan yo‘qoladi. Og‘ir holatlarda uyqusizlikda – 10 mg nitrazepam, 10 mg oksazepam yoki 5 mg diazepam qabul qilinadi. Arterial bosim haddan ziyod oshganida – arterial bosimni nazorati ostida gipotenziv dori vositalari yuboriladi va/yoki davolash nitropreparatlar bilan to‘ldiriladi.

Chiqarilish shakli

Vena ichiga va mushak ichiga yuborish uchun eritma. 2 ml dan rangsiz shishali 5 ta ampula konturli uyali o‘ramda. 2 ta konturli uyali o‘ram qo‘llash bo‘yicha yo‘riqnomasi bilan birga karton qutiga joylanadi.
5 ml dan rangsiz shishali 5 ampula kontur uyali o‘ramda. 1 kontur uyali o‘ram qo‘llash bo‘yicha yo‘riqnomasi bilan birga karton qutiga joylanadi.

Saqlash sharoiti

25°C dan yuqori bo‘lmagan haroratda saqlansin.

Yaroqlilik muddati

3 yil.

Dorixonalardan berish tartibi

Retsept bo‘yicha.

Ishlab chiqaruvchi

Savdo belgisi va qayd etish sertifikatining egasi
«Dr Sertus Ilach Sanayi ve Tidjaret Limited Shirketi», Turkiya
(“Dr Sertus Ilaç Sanayi ve Ticaret Limited Şirketi”, Turkey).

Ishlab chiqarilgan

«Mefar Ilach Sanayii A.Sh.», Turkiya
(Ramazanolu Max. Ensar Djad. № 20, 34906 Kurtkyoy-Pendik/Istambul)
“Mefar llaç Sanayii A. Ş.”, Turkey
(Ramazanoglu Mah. Ensar Cad. No 20, 34906 Kurtkôy-Pendik/Istanbul).
O‘zbekiston Respublikasi xududida dori vositalarining sifati bo‘yicha e'tirozlar (takliflar) ni qabul qiluvchi tashkilot nomi va manzili
«Tar Pharm Alliance» MChJ,
O‘zbekiston Respublikasi, Toshkent sh., Mirobod tumani, Sayxun ko‘ch, 166 uy
Telefon 277-76-78, 277-76-48