Jenavit kapsulalar 100mg №30

Preparatning savdo nomi

Jenavit®
Ta’sir etuvchi modda (XPA) progesteron

Dori shakli

kapsulalar

Tarkibi

1 ta kapsula tarkibida
faol modda tabiiy mikronizatsiyalangan progesteron - 100 mg;
yordamchi moddalar kungaboqar yog‘i, soya letsitini.
kapsula qobig‘ining tarkibi kapsulalar uchun jelatin, glitserin, titan dioksidi (E 171), tozalangan suv*.
* ishlab chiqarish jarayonida bug‘lanadi, yakuniy mahsulotda mavjud emas.
Ta’rifi sharsimon shakldagi yumshoq kapsulalar oq yoki deyarli oq rangda, deyarli oq yoki och sariq pastasimon ichki qismga ega.

Farmakoterapevtik guruhi

Progestagenlar.
ATX kodi G03DA04

Farmakologik xususiyatlari

Farmakodinamika

si
Jenavit® preparatining ta’sir etuvchi moddasi tuxumdon sariq tanasining tabiiy gormoni bilan bir xil bo‘lgan progesterondir. U nishon-a’zolar hujayralari yuzasidagi retseptorlar bilan bog‘lanib, yadroga kiradi, u yerda DNKni faollashtiradi va RNK sintezini rag‘batlantiradi. Bachadon shilliq qavatining follikulyar gormon estradiol ta’sirida yuzaga keladigan proliferatsiya fazasidan sekretor fazaga, urug‘lanishdan keyin esa urug‘langan tuxum hujayra rivojlanishi uchun zarur bo‘lgan holatga o‘tishiga yordam beradi. Bachadon mushaklari va bachadon naychalarining qo‘zg‘aluvchanligini va qisqaruvchanligini kamaytiradi. Normal endometriy hosil bo‘lishiga ko‘maklashadi. Sut bezi oxirgi elementlarining rivojlanishini rag‘batlantiradi va laktatsiyani keltirib chiqaradi.
Proteinlipazani faollashtirish orqali yog‘ zaxirasini ko‘paytiradi; glyukoza o‘zlashtirilishini oshiradi; bazal va stimullangan insulin miqdorini oshirib, jigarda glikogen to‘planishiga ko‘maklashadi; gipofizning gonadotrop gormonlari ishlab chiqarilishini kuchaytiradi; qondagi azot miqdorini kamaytiradi, buyraklar orqali azot chiqarilishini oshiradi.
Farmakokinetika
Og‘iz orqali qabul qilinganda
So‘rilish
Mikronizatsiyalangan progesteron oshqozon-ichak yo‘lida yaxshi so‘riladi. Qon plazmasidagi progesteron miqdori birinchi soat davomida asta-sekin ko‘tariladi, qon plazmasidagi eng yuqori miqdori (Cmax) qabul qilingandan 1-3 soat o‘tgach kuzatiladi. Qon plazmasidagi progesteron miqdori 1 soatdan so‘ng 0,13 ng/ml dan 4,25 ng/ml gacha, 2 soatdan so‘ng 11,75 ng/ml gacha ko‘tariladi va qabul qilingandan 3 soat o‘tgach 8,37 ng/ml, 6 soatdan so‘ng 2 ng/ml va 8 soatdan so‘ng 1,64 ng/ml ni tashkil etadi, individual farqlar bo‘lishi mumkin.
Metabolizm
Qon plazmasida aniqlanadigan asosiy metabolitlar 20-alfa-gidroksi-delta-4-alfa-pregnanolon va 5-alfa-digidrogesteron hisoblanadi.
Chiqarilish
Buyraklar orqali metabolitlar ko‘rinishida chiqariladi, ularning 95% ini glyukuronkonyugatsiyalangan metabolitlar, asosan 3-alfa, 5-beta-pregnandiol tashkil qiladi. Qon plazmasi va siydikda aniqlanadigan ushbu metabolitlar sariq tana fiziologik sekretsiyasida hosil bo‘ladigan moddalarga o‘xshash bo‘ladi.
Qin orqali kiritilganda
So‘rilish va taqsimlanish
Absorbsiya tez sodir bo‘ladi, qon plazmasida progesteronning yuqori konsentratsiyasi yuborilgandan 1 soat o‘tgach kuzatiladi. Qon plazmasidagi progesteron miqdori dori yuborilganidan 2-6 soat o‘tgach eng yuqori darajaga yetadi. Kuniga 2 marta 100 mg dan yuborilganda, qon plazmasidagi o‘rtacha konsentratsiya 24 soat davomida 9,7 ng/ml darajasida saqlanib qoladi. 200 mg/kun dan ortiq dozada yuborilganda, progesteron konsentratsiyasi homiladorlikning I trimestrga mos keladi. Plazma oqsillari bilan bog‘lanishi 90% ni tashkil etadi. Progesteron bachadonda to‘planadi.
Metabolizm
Metabolizmga uchrab, asosan 3-alfa, 5-beta-pregnandiolga aylanadi. Qon plazmasida 5-beta-pregnanolonning konsentratsiyasi oshmaydi.
Chiqarilishi
Buyraklar orqali metabolitlar shaklida chiqariladi, asosiy qismini 3-alfa, 5-beta-pregnandiol (pregnandion) tashkil etadi. Bu uning konsentratsiyasining doimiy oshishi bilan tasdiqlanadi (Smaks 6 soatdan keyin 142 ng/ml ga yetadi).
Qo‘llash ko‘rsatmalari
Ayollarda progesteron tanqisligi holatlari
Ichish uchun
- hayz oldi sindromi;
- ovulyatsiya buzilishi yoki anovulyatsiya tufayli hayz davrining buzilishi;
- abort xavfi yoki progesteron yetishmovchiligi natijasida
takroriy abortni oldini olish;
- lyutein yetishmovchiligi tufayli bepushtlik;
- fibroz-kistoz mastopatiya;
- menopauzaga o‘tish davri;
- peri- va postmenopauzada menopauza (o‘rnini bosuvchi) gormon terapiyasi (MGT) (estrogen saqlovchi preparatlar bilan birgalikda).
Qin ichiga qo‘llash uchun
- Faoliyat ko‘rsatmaydigan (mavjud bo‘lmagan) tuxumdonlarda progesteron yetishmovchiligi holatida (tuxum hujayralari donorligi) MGT;
- ekstrakorporal urug‘lanishga tayyorgarlik vaqtida lyutein fazasini qo‘llab-quvvatlash;
- tabiiy yoki sun’iy chaqirilgan hayz davrida lyutein fazasini qo‘llab-quvvatlash;
- lyutein yetishmovchiligi oqibatida kelib chiqqan bepushtlik;
- progesteron yetishmovchiligi sababli yuzaga kelgan abort xavfi yoki odatiy abortning oldini olish;
- xavf guruhidagi ayollarda (bachadon bo‘yni qisqarishi va/yoki anamnezida erta tug‘ruq va/yoki homila pardalarining erta yorilishi ma’lumotlari mavjud bo‘lgan) muddatidan oldin tug‘ishning oldini olish (profilaktikasi);
- erta menopauza;
- MGT (estrogen saqlagan preparatlar bilan birgalikda).

Qo‘llash usuli va dozalari

Og‘iz orqali
Preparat kechqurun uyqudan oldin suv bilan ichiladi.
Ko‘p hollarda progesteron yetishmovchiligida Jenavit® preparatining kunlik dozasi 200-300 mg ni tashkil etib, 2 qabulga bo‘linadi (100 yoki 200 mg kechqurun uyqudan oldin va 100 mg ertalab, zarurat bo‘lganda).
- lyutein fazasi yetishmovchiligida (hayz oldi sindromi,
fibroz-kistoz mastopatiya, dismenoreya, menopauza o‘tish davri) kunlik doza 200 yoki 400 mg bo‘lib, 10 kun davomida qabul qilinadi (odatda hayz siklining 17-kunidan 26-kunigacha).
- xavfli abort holatida yoki progesteron yetishmovchiligi tufayli odatiy abortning oldini olish uchun homiladorlikning I va II trimestrlarida kuniga 200-600 mg. Homilador ayolning klinik ma’lumotlarini baholash asosida davolovchi shifokor tavsiyasiga ko‘ra, Jenavit® preparatini qo‘llashni davom ettirish mumkin.
- perimenopauzadagi gormon o‘rnini bosuvchi davolash (GOD) paytida estrogenlar qabul qilish fonida Jenavit® preparati
12 kun davomida kuniga 200 mg dan qo‘llaniladi.
- postmenopauzadagi GOD paytida uzluksiz rejimda Jenavit® preparati
estrogen saqlovchi preparatlarni qabul qilishning birinchi kunidan boshlab 100-200 mg dozada qo‘llaniladi. Doza har bir bemor uchun alohida tanlanadi.
Qin orqali
Kapsulalar qinga chuqur kiritiladi.
- faoliyat ko‘rsatmaydigan
(mavjud bo‘lmagan) tuxumdonli ayollarda (tuxum hujayrasi donorligida) progesteron to‘liq yo‘qligi holatida estrogen davolash fonida siklning 13 va 14-kunlarida kuniga 100 mg dan, so‘ngra siklning 15-kunidan 25-kunigacha kuniga 2 marta 100 mg dan, 26-kundan boshlab va homiladorlik aniqlangan taqdirda, doza har hafta kuniga 100 mg dan oshirilib, kuniga 600 mg gacha yetkaziladi va 3 ta qabulga bo‘linadi. Ko‘rsatilgan doza 60 kun davomida qo‘llanilishi mumkin.
- ekstrakorporal urug‘lantirish sikli davomida lyutein fazasini qo‘llab-quvvatlash
xorionik gonadotropin in’eksiyasi kunidan boshlab homiladorlikning I va II trimestrlari davomida kuniga 200 dan 600 mg gacha qo‘llash tavsiya etiladi.
- tabiiy yoki sun’iy chaqirilgan hayz siklida lyutein fazasini qo‘llab-quvvatlash
Sariq tana funksiyasi buzilishi bilan bog‘liq bepushtlik siklida siklning 17-kunidan boshlab 10 kun davomida kuniga 200-300 mg qo‘llash tavsiya etiladi. Hayz kechikishi va homiladorlik aniqlanganda davolash davom ettirilishi lozim.
- Ayollarda muddatidan oldin tug‘ruqning oldini olish (profilaktikasi)
xavf guruhida (bachadon bo‘yni qisqarishi va/yoki anamnezida muddatidan oldin tug‘ruq va/yoki homila pufagining muddatidan oldin yorilishi ma’lumotlari mavjud bo‘lganda) odatda homiladorlikning 22-haftasidan 34-haftasigacha uyqudan oldin 200 mg doza qo‘llaniladi.
- Abort xavfi bo‘lganda yoki odatiy abortning oldini olish maqsadida,
progesteron yetishmovchiligi fonida yuzaga keladigan holatlarda homiladorlikning I va II trimestrlarida kuniga 200-400 mg ni 2 marta qabul qilish.
Nojo‘ya ta’sirlar
Preparatni og‘iz orqali qo‘llashda kuzatilgan, quyida sanab o‘tilgan noxush hodisalar yuzaga kelish chastotasiga ko‘ra quyidagi tartibda taqsimlangan tez-tez >1/100, <1/10; kamdan-kam >1/1000, <1/100; kam hollarda >1/10000, <1/1000; juda kam hollarda <1/10000.
Jinsiy a’zolar va sut bezi tomonidan tez-tez - hayz siklining buzilishi, amenoreya, atsiklik qon ketishlar; kamdan-kam - mastodiniya.
Ruhiy holat juda kam hollarda - depressiya.
Asab tizimi tomonidan tez-tez - bosh og‘rig‘i; kamdan-kam - uyquchanlik, o‘tkinchi bosh aylanishi.
Oshqozon-ichak trakti tomonidan tez-tez - qorin dam bo‘lishi; kamdan-kam - qusish, ich ketishi, qabziyat; kam hollarda - ko‘ngil aynishi.
Jigar va o‘t yo‘llari tomonidan kamdan-kam - xolestatik sariqlik.
Immun tizimi tomonidan juda kamdan-kam - eshakem.
Teri va teri osti to‘qimalari tomonidan kamdan-kam - qichima, akne; juda kamdan-kam - xloazma
Bu nojo‘ya ta’sirlar odatda dozani oshirib yuborishning dastlabki belgilari hisoblanadi. Uyquchanlik va o‘tkinchi bosh aylanishi, odatda, dori vositasini og‘iz orqali qabul qilgandan 1-3 soat o‘tgach paydo bo‘lishi mumkin. Ushbu nojo‘ya ta’sirlarni dozani kamaytirish, dori vositasini uyqudan oldin qabul qilish yoki qin orqali yuborish usulini qo‘llash orqali kamaytirish mumkin.
Uyquchanlik va/yoki o‘tkinchi bosh aylanishi, ayniqsa, yondosh gipoestrogen holatlarda kuzatiladi. Dozani kamaytirish yoki yuqori estrogenizatsiyani tiklash progesteronning davolash samaradorligini pasaytirmasdan ushbu holatlarni darhol bartaraf etadi.
Agar davolash kursi juda erta boshlansa (hayz siklining birinchi yarmida, ayniqsa 15-kundan oldin), hayz siklining qisqarishi yoki atsiklik qon ketishi mumkin.
Qayd etilgan hayz siklining o‘zgarishi, amenoreya yoki atsiklik qon ketishlar barcha gestagenlar uchun xos hisoblanadi.
Klinik amaliyotda qo‘llanilishi
Klinik amaliyotda progesteronni og‘iz orqali qo‘llashda quyidagi noxush holatlar kuzatilgan uyqusizlik; hayz oldi sindromi; ko‘krak bezlarining taranglashuvi; qindan ajralmalar; bo‘g‘imlarda og‘riq; tana haroratining ko‘tarilishi; tunda ko‘p terlash; organizmda suyuqlik ushlanib qolishi; tana vaznining o‘zgarishi; o‘tkir pankreatit; soch to‘kilishi, ortiqcha tuklanish; jinsiy maylning o‘zgarishi; tromboz va tromboembolik asoratlar (estrogenli preparatlar bilan birgalikda gormon o‘rnini bosish terapiyasi o‘tkazilganda); qon bosimining oshishi.
Preparat tarkibiga o‘ta sezuvchanlik reaksiyalarini (eshakem va anafilaktik shok) keltirib chiqarishi mumkin bo‘lgan soya letsitini kiradi.
Qin orqali qo‘llanilganda
Preparat tarkibidagi moddalarni (ayniqsa, soya letsitinini) mahalliy ko‘tara olmaslik reaksiyalari qin shilliq qavatining qizarishi, achishish, qichishish, yog‘simon ajralmalar ko‘rinishida rivojlanishining ayrim holatlari qayd etilgan.
Preparatni tavsiya etilgan dozalarda qin orqali qo‘llashda umumiy nojo‘ya ta’sirlar, xususan, uyquchanlik yoki bosh aylanishi (preparatni og‘iz orqali qabul qilishda kuzatilgan) aniqlanmagan.
Qarshi ko‘rsatmalar
Progesteron yoki preparatning har qanday yordamchi moddalariga yuqori sezuvchanlik; chuqur venalar trombozi, tromboflebit; tromboembolik buzilishlar (o‘pka arteriyasi tromboemboliyasi, miokard infarkti, insult), bosh ichiga qon quyilishi yoki anamnezda ushbu holatlar/kasalliklarning mavjudligi; noma’lum sabablarga ko‘ra qindan qon ketishi; to‘liq bo‘lmagan abort; porfiriya; sut bezi va jinsiy a’zolarning aniqlangan yoki gumon qilingan xavfli o‘smalari; hozirgi vaqtda yoki anamnezda og‘ir jigar kasalliklari (shu jumladan xolestatik sariqlik, gepatit, Dubin-Jonson, Rotor sindromlari, jigarning xavfli o‘smalari); 18 yoshgacha bo‘lgan bolalar (samaradorligi va xavfsizligi aniqlanmagan); emizish davri.
Ehtiyotkorlik bilan qo‘llanilishi lozim
Yurak-qon tomir tizimi kasalliklari, arterial gipertenziya, surunkali buyrak yetishmovchiligi, qandli diabet, bronxial astma, epilepsiya, migren, depressiya, giperlipoproteinemiya, jigar funksiyasining yengil va o‘rtacha darajadagi buzilishlari; yorug‘likka sezuvchanlik.
Preparat homiladorlikning II va III trimestrlarida ehtiyotkorlik bilan qo‘llanilishi kerak.
Dori vositalarining o‘zaro ta’siri
Og‘iz orqali qabul qilinganda
Progesteron diuretiklar, gipotenziv dori vositalari, immunodepressantlar va antikoagulyantlarning ta’sirini kuchaytiradi. Oksitotsinning laktogen ta’sirini kamaytiradi. Barbituratlar, epilepsiyaga qarshi dorilar (fenitoin, karbamazepin), rifampitsin, fenilbutazon, spironolakton, grizeofulvin kabi CYP3A4 jigar mikrosomal fermentlari induktorlari bilan bir vaqtda qo‘llanilganda jigarda progesteron metabolizmi tezlashadi.
Progesteronni ba’zi antibiotiklar (penitsillinlar, tetratsiklinlar) bilan bir vaqtda qabul qilish ichak mikroflorasining o‘zgarishi natijasida jinsiy gormonlarning ichak-jigar aylanishining buzilishiga olib keladi va bu uning samaradorligini pasaytirishi mumkin.
Ko‘rsatilgan o‘zaro ta’sirlarning namoyon bo‘lish darajasi turli bemorlarda farq qilishi mumkin, shu sababli sanab o‘tilgan o‘zaro ta’sirlarning klinik natijalarini oldindan aytish qiyin.
Ketokonazol progesteronning biosinguvchangligini oshirishi mumkin.
Progesteron ketokonazol va siklosporin miqdorini oshirishi mumkin.
Progesteron bromokriptinning samaradorligini pasaytirishi mumkin.
Progesteron glyukozaga tolerantlikni pasaytirishi mumkin, natijada qandli diabet bilan kasallangan bemorlarda insulin yoki boshqa gipoglikemik dorilarga bo‘lgan ehtiyoj ortadi.
Chekuvchi bemorlarda va spirtli ichimliklarni ko‘p iste’mol qiluvchilarda progesteronning biosinguvchanligi pasayishi mumkin.
Qin ichiga qo‘llanilganda
Progesteronning boshqa dori vositalari bilan o‘zaro ta’siri qin orqali qo‘llanilganda o‘rganilmagan. Progesteron ajralib chiqishi va so‘rilishining buzilishiga yo‘l qo‘ymaslik uchun bir vaqtning o‘zida qin ichiga qo‘llaniladigan boshqa dori vositalaridan foydalanishdan saqlanish lozim.

Maxsus ko‘rsatmalar

Jenavit® preparatini kontratsepsiya maqsadida qo‘llash mumkin emas.
Preparatni ovqat bilan birga qabul qilish mumkin emas, chunki ovqatlanish progesteronning biologik o‘zlashtirilishini oshiradi.
Jenavit® preparatini suyuqlik ushlanib qolishi mumkin bo‘lgan kasalliklar va holatlar (arterial gipertenziya, yurak-qon tomir kasalliklari, surunkali buyrak yetishmovchiligi, epilepsiya, migren, bronxial astma) mavjud bemorlarda; qandli diabet bilan og‘rigan bemorlarda; yengil va o‘rta darajadagi jigar faoliyati buzilishlari; yorug‘likka sezuvchanlik mavjud bemorlarda ehtiyotkorlik bilan qo‘llash lozim.
Anamnezida depressiya bo‘lgan bemorlarni kuzatib borish va og‘ir darajadagi depressiya rivojlangan taqdirda preparatni to‘xtatish zarur.
Jenavit® tarkibida o‘ta sezuvchanlik reaksiyalarini (eshakem va anafilaktik shok) keltirib chiqarishi mumkin bo‘lgan soya letsitini mavjud.
Yurak-qon tomir kasalliklari bilan og‘rigan yoki anamnezida shunday kasalliklar bo‘lgan bemorlar ham vaqti-vaqti bilan shifokor nazoratida bo‘lishlari kerak.
Homiladorlikning I trimestridan keyin Jenavit® preparatini qo‘llash xolestaz rivojlanishiga olib kelishi mumkin.
Progesteron bilan uzoq muddat davolanishda muntazam ravishda tibbiy ko‘rikdan o‘tish lozim (jumladan jigar faoliyatini tekshirish); jigar funksional sinovlarining normal ko‘rsatkichlaridan chetlanish yoki xolestatik sariqlik paydo bo‘lgan holda davolashni to‘xtatish kerak.
Progesteron qo‘llanilganda qandli diabet bilan og‘rigan bemorlarda glyukozaga tolerantlik pasayishi, insulin va boshqa gipoglikemik dorilarga bo‘lgan ehtiyoj ortishi mumkin.
Davolash jarayonida amenoreya yuzaga kelsa, homiladorlikni istisno etish zarur.
Agar davolash kursi hayz siklining boshida, ayniqsa siklning 15-kunidan oldin juda erta boshlanib qolsa, siklning qisqarishi va/yoki notsiklik qon ketishi mumkin. Notsiklik qon ketishlarda uning sababi aniqlanmaguncha, shu jumladan endometriyning gistologik tekshiruvi o‘tkazilmaguncha, preparatni qo‘llamaslik lozim.
Anamnezda xloazma mavjud bo‘lsa yoki uning rivojlanishiga moyillik bo‘lsa, bemorlarga ultrabinafsha nurlanishdan saqlanish tavsiya etiladi.
Homiladorlikning dastlabki muddatlarida o‘z-o‘zidan abort qilish holatlarining 50% dan ortig‘i genetik buzilishlar bilan bog‘liq. Bundan tashqari, homiladorlikning erta muddatlarida o‘z-o‘zidan abort qilishning sababi infeksion jarayonlar va mexanik shikastlanishlar bo‘lishi mumkin. Bunday holatlarda Jenavit® preparatini qo‘llash faqat hayotga layoqatsiz homila tuxumining ko‘chib tushishi va evakuatsiyasining kechikishiga olib kelishi mumkin. Xavf ostidagi abortning oldini olish maqsadida Jenavit® preparatini qo‘llash faqat progesteron yetishmovchiligi holatlarida o‘zini oqlaydi.
Perimenopauza davrida estrogenlar bilan MGT o‘tkazilganda, hayz siklining kamida 12 kuni davomida Jenavit® preparatini qo‘llash tavsiya etiladi.
Postmenopauzada MGTning uzluksiz rejimida preparatni estrogenlarni qabul qilishning birinchi kunidan boshlab qo‘llash maqsadga muvofiq.
MGT o‘tkazilganda venoz tromboemboliya (chuqur venalar trombozi yoki o‘pka arteriyasi tromboemboliyasi), ishemik insult, yurak ishemik kasalligi rivojlanish xavfi ortadi.
Tromboembolik asoratlar rivojlanish xavfi tufayli quyidagi hollarda preparatni qo‘llashni to‘xtatish lozim ko‘rish qobiliyatini yo‘qotish, ekzoftalm, ko‘zda ikkilanish, to‘r pardaning qon tomirlari shikastlanishi kabi ko‘rish buzilishlari; migren; venoz tromboemboliya yoki trombotik asoratlar, ularning joylashuvidan qat’i nazar.
Anamnezida tromboflebit mavjud bo‘lsa, bemor diqqat bilan kuzatib borilishi shart.
Jenavit® preparatini estrogen saqlovchi dori vositalari bilan birga qo‘llanilganda, venoz tromboemboliya xavfi bo‘yicha ularni qo‘llash yo‘riqnomalariga e’tibor qaratish zarur.
Women Health Initiative Study (WHI) klinik tadqiqotining natijalari estrogen saqlovchi preparatlarni sintetik gestagenlar bilan birgalikda uzoq muddat, 5 yildan ortiq qo‘llanilganda sut bezi saratoni xavfining biroz oshishini ko‘rsatdi. Postmenopauzadagi ayollarda progesteron bilan birgalikda estrogen saqlovchi preparatlar bilan MGT o‘tkazilganda ko‘krak bezi saratoni xavfining oshishi mavjudligi hali noma’lum.
WHI tadqiqoti natijalari, shuningdek, 65 yoshdan keyin MGT boshlanganida demensiya rivojlanish xavfi oshishini aniqladi.
MGTni boshlashdan oldin va uni o‘tkazish davomida muntazam ravishda ayol qarshi ko‘rsatmalarni aniqlash uchun tekshiruvdan o‘tishi lozim. Klinik ko‘rsatmalar mavjud bo‘lganda, sut bezlari tekshiruvi va ginekologik ko‘rik o‘tkazilishi shart.
Progesteron qo‘llanilishi ba’zi laboratoriya tahlillari natijalariga ta’sir ko‘rsatishi mumkin, jumladan jigar, qalqonsimon bez funksiyasi ko‘rsatkichlari; qon ivish parametrlari; pregnandiol konsentratsiyasi.
Homiladorlik va laktatsiya davrida qo‘llanilishi
Preparat xolestaz rivojlanish xavfi tufayli homiladorlikning II va III trimestrlarida ehtiyotkorlik bilan qo‘llanilishi lozim.
Progesteron ona sutiga o‘tganligi sababli, emizish davrida preparatni qo‘llash man etiladi.
Avtomobil va murakkab mexanizmlarni boshqarish qobiliyatiga ta’siri
Preparatni og‘iz orqali qabul qilganda transport vositalarini boshqarishda va yuqori diqqat hamda tez psixomotor reaksiyalarni talab qiladigan boshqa potensial xavfli faoliyat turlarida ehtiyotkorlik talab etiladi.
Dozani oshirib yuborish
Belgilariuyquchanlik, o‘tkinchi bosh aylanishi, eyforiya, hayz davrining qisqarishi, dismenoreya.
Ba’zi bemorlarda progesteronning beqaror endogen sekretsiyasi, preparatga o‘ta sezuvchanlik yoki estradiolning juda past konsentratsiyasi tufayli o‘rtacha terapevtik doza haddan tashqari yuqori bo‘lishi mumkin.
Davolash
- uyquchanlik yoki bosh aylanishi paydo bo‘lganda, hayz davrining 10 kuni davomida kunlik dozani kamaytirish yoki dori vositasini uyqudan oldin qabul qilishni tayinlash lozim;
- hayz sikli qisqarganda yoki qon dog‘lari paydo bo‘lganda davolashni siklning keyinroq kuniga ko‘chirish tavsiya etiladi (masalan, 17-kun o‘rniga 19-kuni);
- perimenopauzada va postmenopauzada gormonlar bilan davolashda estradiol konsentratsiyasi optimal ekanligiga ishonch hosil qilish zarur.
Doza oshirib yuborilganda, zarurat tug‘ilsa, simptomatik davolash o‘tkaziladi.
Chiqarish shakli
6 kapsuladan konturli yacheykali qadoqda. 5 ta konturli yacheykali qadoq, davlat va rus tillaridagi tibbiy qo‘llash bo‘yicha yo‘riqnoma bilan birga karton qutiga joylashtiriladi.
Saqlash shartlari
10-30 °C haroratda, quruq, yorug‘likdan himoyalangan joyda saqlang.
Bolalar qo‘li yetmaydigan joyda saqlang.

Yaroqlilik muddati

3 yil.

Yaroqlilik muddati

o‘tgach ishlatilmasin.
Dorixonalardan berilish tartibi
Retsept asosida.

Ishlab chiqaruvchi

Zhejiang Asen Pharmaceutical Co., Ltd., XXR
Manzil 2-ko‘cha, 8-uy, Xanchjou iqtisodiy va texnologik rivojlanish hududi
O‘zbekiston Respublikasi hududida dori vositalarining sifati bo‘yicha shikoyatlarni (takliflarni) qabul qiluvchi tashkilotning nomi va manzili
"RAIN SEN DA" MChJ
O‘zbekiston Respublikasi, Toshkent shahri, Sergeli tumani, Aviashaharcha, 132
Tel. +998 71 215 54 26