Berotek eritmasi 20ml

Preparatning savdo nomi

BEROTEK N
Ta'sir etuvchi modda (XPN) fenoterol

Dori shakli

ingalyatsiya uchun dozalangan aerozol

Tarkibi

Bir ingalyatsion doza quyidagilarni saqlaydi
faol modda 100 mkg (0,100 mg) fenoterol gidrobromidi;
yordamchi moddalar suvsiz limon kislotasi, tozalangan suv, absolyut etanol;
propellent 1,1,1,2 - tetroftoretan (HFA 134a).
Ta'rifi 17 ml hajmli, 50 mkl dozalovchi klapanli zanglamas po‘latdan qilingan butun ballonchaga bosim ostida joylangan, suspenzion zarrachalardan xoli bo‘lgan tiniq rangsiz yoki deyarli rangsiz suyuqlik.

Farmakoterapevtik guruhi

Nafas yo‘llarining obstruktiv kasalliklarini davolash uchun vositalar. Beta2-adrenoretseptorlarning selektiv agonistlari.
ATX kodi R03AC04.

Farmakologik xususiyatlari

Farmakodinamika

si
BEROTEK N bronxial astma xurujlarida va o‘pka emfizemasi yoki usiz surunkali obstruktiv bronxit kabi nafas yo‘llarining obstruktsiyasi bilan birga kechuvchi boshqa holatlarda samarali bronxodilatator hisoblanadi.
O‘pkaning obstruktiv kasalliklarida fenoterol ingalyatsion yuborilganidan keyin, bronxlarning kengayishi bir necha minut davomida yuz beradi. Bronxodilatatsion ta'siri 3-5 soat davom etadi.
Fenoterol ko‘proq beta2-retseptorlarga ta'siri bilan bevosita ta'sir etuvchi beta-adrenomimetik hisoblanadi. Beta1-adrenoretseptorlarning stimulyatsiyasi faqat preparat yuqori dozalarda (masalan, tokoliz uchun yuborilganida) qo‘llanganida yuz beradi.
Fenoterol bronxlar va qon tomirlarning silliq mushaklari tonusini pasayishini chaqiradi. Silliq mushak tonusini pasayishining yaqqolligi dozaga bog‘liq. Preparatni beta2-adrenoretseptor bilan bog‘lanishi, stimulyatsiya qiluvchi Gs-oqsil orqali adenilattsiklazani faollashtiradi, keyinchalik sAMF ni hosil bo‘lishi oshadi, u esa o‘z navbatida proteinkinaza A ni faollashtiradi. Proteinkinaza silliq mushak xujayralaridagi nishon oqsillarni fosforlaydi, bu ularni bo‘shashashini chaqiradi. Fenoterol yuqori dozalarda shunigdek ko‘ndalang-targ‘il mushaklarga ham ta'sir qiladi (tremor). Bundan tashqari, fenoterol semiz xujayralardan mediatorlarni ajralib chiqishini ingibitsiya qiladi. 0,6 mg fenoterol qabul qilinganidan keyin mukotsiliar transportni kuchayishi kuzatiladi.
Fenoterol yurakka musbat inotrop va xronotrop ta'sir (bevosita va/yoki reflektor) ko‘rsatadi. Lipidlar va uglevodlar almashinuvidagi o‘zgarishlar (lipoliz, glikogenolizga ta'siri va giperglikemiya), shuningdek skelet mushaklariga K+ ni kirishini oshishi oqibatidagi nisbiy gipokaliyemiya, preparat faqat yuqori dozalarda qo‘llanganida namoyon bo‘luvchi farmakologik samaralari hisoblanadi.
Boshqa beta-adrenergik vositalari qo‘llanganda bo‘lgani kabi, QTc intervalini uzayishi haqida xabarlar berilgan. Dozalovchi ingalyator yordamida yuboriladigan fenoterol uchun bu ko‘rinishlar kuchsiz ifodalangan va tavsiya etilgandan yuqori dozalarda kuzatilgan. Patsiyentlar uchun ahamiyati isbotlanmagan.
Miometriyda beta2-retseptorlarning zichligi yuqoriligi tufayli, fenoterol bachadon mushagining tonusini pasayishini chaqirishi mumkin. Bu samara ayniqsa homiladorlik vaqtida yaqqol namoyon bo‘ladi. Tokoliz o‘tkazish uchun fenoterolning dozasi, bronxospazmni davolash uchun qo‘llanadigan dozadan sezilarli yuqori bo‘ladi. Dozani oshirilishi tufayli nojo‘ya samaralarini paydo bo‘lish ehtimoli oshadi.

Farmakokinetikasi

BEROTEK N ning terapevtik samarasiga nafas yo‘llariga lokal ta'siri orqali erishiladi. Ingalyatsion tarzda yuborilgandan keyin erishiladigan fenoterolning qondagi kontsentratsiyasi va “vaqt-samara” farmakodinamik egri chizig‘i orasida korrelyatsiya mavjud emas.
Ingalyatsiya usuli va ishlatilayotgan ingalyatsion tizimga qarab, ingalyatsiyada aerozol preparatdan ajralib chiqayotgan faol moddaning taxminan 10-30% quyi nafas yo‘llariga yetib boradi, qolgan qismi esa yuqori nafas yo‘llarida qoladi va so‘ngra yutiladi.
BEROTEK N ning bir dozasi ingalyatsion tarzda yuborilganidan keyin fenoterolning mutloq biokiraolishligi 18,7% ni tashkil qiladi.
Ingalyatsion yuborilganidan keyin so‘rilish tezligi yuborilgan dozaning 13% ni tashkil qilgan, bunda so‘rilish ikki fazali bo‘lgan fenoterol gidrobromidining - 30% tez so‘rilgan, yarim chiqarilish davri esa 11 minutni tashkil qilgan; 70% sekin so‘rilgan, yarim chiqarilish davri 120 minutni tashkil qilgan.
Peroral yuborilganidan keyin fenoterolning taxminan 60% so‘riladi. So‘rilgan qismi jigar orqali “birinchi o‘tish samarasi” oqibatida jadal biotransformatsiyaga uchraydi, buning natijasida peroral yuborilganidan keyin preparatning biokiraolishligi taxminan 1,5% ni tashkil qiladi. Shunday qilib, ingalyatsion yuborishda yutib yuborilgan preparat, faol moddaning qon plazmasidagi kontsentratsiyasiga deyarli ta'sir qilmaydi. Qon plazmasidagi maksimal kontsentratsiyasiga 60-120 minut davomida erishiladi.
Fenoterol turli a'zolar va to‘qimalarga taqsimlanadi. Vena ichiga yuborilganidan keyin statsionar holatidagi taqsimlanish hajmi (Vss) 1,9-2,7 l/kg ni tashkil qiladi. Vena ichiga yuborilganidan keyin qon plazmasida fenoterolni taqsimlanishi yarim chiqarilish davrlari tά=0,42 minut, tβ=14,3 minut va tγ=3,2 soat bo‘lgan uch fazali model bo‘yicha kechadi. Plazma oqsillari bilan bog‘lanishi 40-55% ni tashkil qiladi.
Fenoterol odamda glyukuronidlar va sulfatlargacha kon'yugatsiyasi yo‘li bilan jadal metabolizmga uchraydi. Peroral yuborilganidan keyin Fenoterol asosan sulfatlanish yo‘li bilan metabolizmga uchraydi. Dastlabki moddaning metabolik faolsizlanishi ichak devoridayoq boshlanadi.
Biotransformatsiyasi, shu jumladan safro bilan chiqarilishi, vena ichiga yuborilganidan keyin minutiga 1,1-1,8 l ga teng o‘rtacha umumiy klirensining asosiy qismini (taxminan 85%) tashkil qiladi. Fenoterolni siydik bilan chiqarilishi (minutiga 0,27 l), tizimli kirgan dozaning o‘rtacha umumiy klirensining taxminan 15% ga to‘g‘ri keladi. Dori vositasining qon plazmasi oqsillari bilan bog‘lanadigan ulushini e'tiborga olib, buyrak klirensining hajmi glomerulyar filtratsiyaga qo‘shimcha ravishda fenoterolning tubulyar sekretsiyasi borligidan dalolat beradi.
Peroral va vena ichiga yuborilganidan keyin 48 soat davomida siydik bilan chiqarilgan umumiy radiofaollik muvofiq ravishda dozaning taxminan 39% va 65% ni tashkil qiladi, ahlat bilan chiqarilgan radiofaol modda esa muvofiq dozaning 40,2% va 14,8% ni tashkil qiladi. Peroral yuborilganidan keyin dozaning 0,38% siydik bilan dastlabki substantsiya ko‘rinishida chiqariladi, shu vaqtning o‘zida vena ichiga yuborilganidan keyin 15% o‘zgarmagan holda chiqariladi. Dozalangan aerozol yordamida ingalyatsion tarzda yuborilganidan keyin o‘zgarmagan ko‘rinishda buyrak orqali dozaning 2% 24 soat davomida chiqariladi.
Fenoterol metabolizmga uchramagan holatda yo‘ldosh orqali o‘tishga qodir. Homilada simpatomimetik samaralarining ko‘rinishlari bo‘lishi mumkin. Uzoq muddatli infuziyadan keyin homila qonidagi fenoterolning aniqlangan darajasi ona qonidagi fenoterolning kontsentratsiyasini 50% gachasini tashkil qilgan. Chala tug‘ilgan chaqaloqlarda fenoterolni chiqarilishi, kattalarda chiqarilishi bilan solishtirilganda, sezilarli darajada sekinroq bo‘lgan. Fenoterol ko‘krak sutiga o‘tadi.
Qandli diabeti bo‘lgan patsiyentlarda fenoterolni moddalar almashinuviga ta'siri haqida yetarli miqdorda ma'lumotlar yo‘q.
Yangi tug‘ilgan chaqaloqlar va 20 oylikkacha bo‘lgan bolalarda samara yetarlicha ifodalanmagan bo‘lishi yoki umuman bo‘lmasligi mumkin.

Qo‘llanilishi

• Astmaning o‘tkir xurujlarini simptomatik davolash.
• Jismoniy zo‘riqish bilan bog‘liq bronxial astmada xurujlarni oldini olish.
• Allergik va noallergik bronxial astma va/yoki nafas yo‘llarining qaytuvchan obstruktsiyasi bilan kechuvchi boshqa kasalliklarni, masalan, o‘pka emfizemasi yoki usiz kechuvchi surunkali obstruktiv bronxitni simptomatik davolashda qo‘llanadi.
Davomli davolash muvofiq yallig‘lanishga qarshi davolash bilan birga kechishi kerak.

Qo‘llash usuli va dozalari

Dozalash kasallik va uning og‘irligiga bog‘liq.
Agar boshqacha buyurilmagan bo‘lsa, kattalar va 6 yoshdan oshgan bolalar uchun quyidagi dozalash tartibi tavsiya etiladi
Hansirash xuruji bilan kechuvchi bronxlar silliq mushaklarining to‘satdan paydo bo‘lgan spazmini bartaraf etish uchun, bir dozani (100 mkg fenoterol gidrobromidi) ingalyatsiya qilish tavsiya etiladi.
Odatda, bronxlarning o‘tkazuvchanligini sezilarli oshishini ta'minlash uchun bir ingalyatsion doza yetarli bo‘ladi. Birinchi dozadan keyin 5 minut davomida ahamiyatli darajada yaxshilanish bo‘lmaganida, ikkinchi ingalyatsion dozani qo‘llash mumkin. Hansirashning og‘ir xuruji va ikkinchi ingalyatsion dozaning samarasizligi qo‘shimcha dozalarni qo‘llash zaruratini anglatishi mumkin. Bunday hollarda patsiyent darhol tibbiy yordamga murojaat qilishi kerak.
Davomli davolash zarurati bo‘lganida BEROTEK N ning tavsiya etiladigan dozasi kuniga 3-4 marta 1-2 ingalyatsion dozani tashkil qiladi. Har bir yuborish vaqti va dozani, hansirashning tez-tezligi va og‘irligiga muvofiq ravishda tanlash afzal hisoblanadi (simptomatik davolash). Bunday davolash, ayniqsa bronxial astmada davomli yallig‘lanishga qarshi davolash bilan birga kechishi kerak. Ignalyatsiyalar orasidagi interval 3 soatdan kam bo‘lmasligi kerak. Sutkalik doza 8 ingalyatsion dozalardan, maksimal bir martalik doza - 4 ingalyatsion dozalardan oshmasligi kerak, chunki yuqoriroq dozalari, odatda, qo‘shimcha terapevtik samara ko‘rsatmaydi, lekin potentsial jiddiy nojo‘ya samaralar rivojlanishiga olib kelishi mumkin.
Maqsadga yo‘naltirilgan jismoniy zo‘riqish bilan bog‘liq bronxial astma xurujini oldini olish uchun yoki allergen bilan kutilgan kontakda, taxmin qilingan jismoniy yuklama/allergen bilan kontaktdan 10-15 minut oldin BEROTEK N ning 1-2 ingalyatsion dozasi tavsiya etiladi.
Agar boshqacha buyurilmagan bo‘lsa, 4-6 yoshli bolalar uchun quyidagi dozalash tartibi tavsiya etiladi
Hansirash xuruji bilan kechuvchi bronxlar silliq mushaklarining to‘satdan paydo bo‘lgan spazmini bartaraf etish uchun, bir ingalyatsion doza (100 mkg fenoterol gidrobromidi) tavsiya etiladi
Davomli davolash zarurati bo‘lganida BEROTEK N ning tavsiya etiladigan dozasi kuniga 4 marta 1 ingalyatsion dozani (100 mkg fenoterol gidrobromidi) tashkil qiladi. Har bir yuborish vaqti va dozani, hansirashning tez-tezligi va og‘irligiga muvofiq ravishda tanlash afzal hisoblanadi (simptomatik davolash). Bunday davolash davomli yallig‘lanishga qarshi davolash bilan, ayniqsa bronxial astmada birga kechishi kerak. Ingalyatsiyalar orasidagi interval 3 soatdan kam bo‘lmasligi kerak. Sutkalik doza 4 ingalyatsion dozalardan, maksimal bir martalik doza - 2 ingalyatsion dozalardan oshmasligi kerak, chunki yuqoriroq dozalari, odatda, qo‘shimcha terapevtik samara ko‘rsatmaydi, lekin potentsial jiddiy nojo‘ya samaralarni rivojlanishiga olib kelishi mumkin.
Maqsadga yo‘naltirilgan jismoniy zo‘riqish bilan bog‘liq bronxial astma xurujini oldini olish uchun yoki allergen bilan kutilgan kontakda, taxmin qilingan jismoniy yuklama/allergen bilan kontaktdan 10-15 minut oldin BEROTEK N ning 1 ingalyatsion dozasi (100 mkg fenoterol gidrobromidi) tavsiya etiladi.
Ushbu dori shakli 4 yoshdan kichik bolalarda qo‘llash uchun mo‘ljallanmagan.
Agar, buyurilgan davolashga qaramay, holatni adekvat yaxshilanishi yuz bermasa, yoki, aksincha, holatni yomonlashishi kuzatilsa, buyurilgan davolashni muvofiqlashtirish uchun shifokorga murojaat qilish va zarurati bo‘lganida, qo‘shimcha - yallig‘lanishga qarshi vositalar (kortikosteroidlar), bronxodilatatorlar (teofillin) bilan davolashni buyurish - yoki qo‘llanayotgan dori vositalarining dozasini o‘zgartirish kerak. Astmani kechishini to‘satdan va avj olib boruvchi yomonlashishi hayot uchun xavfli bo‘lishi mumkin. Bunday hollarda darhol shifokorga murojaat qilish kerak. Buyurilgan dozani ahamiyatli darajada oshirish xavfli bo‘lishi mumkin.
Adekvat yallig‘lanishga qarshi davolashsiz beta2-adrenomimetiklarning ingalyatsion dozalarini yuqori va juda yuqori dozalarda uzoq vaqt davomida qo‘llanganda, bronxial astmani jiddiy, shu jumladan fatal asoratlarini oshish xavfi qayd qilingan. Sabab-oqibat bog‘liqligi aniq aniqlanmagan. Shunga qaramay, yallig‘lanishga qarshi davolashning noadekvatligi, ehtimol, hayotiy muhim rol o‘ynasa kerak.
Bronxial astmani davolash kasallikning og‘irlik darajasiga mos kelishi kerak. O‘tkazilayotgan davolashning adekvatligi muntazam tibbiy tekshirishlarning natijalari bilan tasdiqlanishi kerak.
Beta2-simpatomimetiklarning, shu jumladan BEROTEK N ning ham tavsiya etilgan dozasini shifokorning maslahatisiz, mustaqil oshirish patsiyent uchun xavfli bo‘lishi mumkin. Astmani kechishini to‘satdan va avj olib boruvchi yomonlashishi hayot uchun xavf tug‘dirishi mumkin.
BEROTEK N kabi beta2-simpatomimetiklarga oshib borayotgan ehtiyoj, kasallikning og‘irlik darajasini oshishi va/yoki davolashning noadekvatligining belgisi hisoblanadi. Bunday vaziyatda o‘tkazilayotgan davolashni muvofiqlashtirish va yallig‘lanishga qarshi dori vositalarini qo‘shimcha buyurish yoki qabul qilinayotgan yallig‘lanishga qarshi preparatlarning dozalariga tuzatish kiritish yoki qo‘shimcha dori vositalarini buyurish maqsadida shifokor bilan maslahatlashishi kerak.
Kasallikni kechishini, shuningdek buyurilgan bronxodilatator va yallig‘lanishga qarshi davolashning adekvatligini tibbiy baholash uchun shifokorning ko‘rsatmalariga muvofiq har kungi mustaqil nazoratni o‘tkazish juda muhimdir. Uni, masalan, pikfloumetr yordamida nafas faoliyatini aniqlab amalga oshirish mumkin.
Qo‘llash usuli
Qo‘llash bo‘yicha yo‘riqnomasiga muvofiq ishlating!
Dozalangan aerozollarning moslamalari bilan to‘g‘ri muomala qilish muvaffaqiyatli davolash uchun juda muhimdir.
Ingalyatsiyada ballonchadagi strelka, ingalyatsiya qilinayotgan patsiyentning tana holatidan qat'iy nazar, yuqoriga, mundshtuk esa - pastga yo‘naltirilgan bo‘lishi kerak. Preparatni o‘tirgan yoki turgan holatda qo‘llash tavsiya etiladi.
Birinchi qo‘llash oldidan ballonchaning tubiga ikki marta bosing.
Har bir bosishda quyidagilarni bajarish kerak
1.Himoya qalpoqchani yechib oling (1-rasm)
2.Chuqur nafas oling.
3.Ballonchani 2-rasmda ko‘rsatilganidek tutib turib, mundshtukni lablar bilan zicho‘rab oling.
4.Sekin chuqur nafas oling va bir vaqtda ballonchaning tubiga kuchli bosing, bunda preparatning bir dozasi ajralib chiqadi. Nafas bir necha sekund tutib turiladi, so‘ngra mundshtuk og‘izdan chiqariladi va sekin nafas chiqariladi.
Agar yaqqol nafas yetishmovchiligi oqibatida chuqur nafas olishning imkoniyati bo‘lmasa, nafasni yengillashtirish va keyinchalik preparatni to‘g‘ri qo‘llash maqsadida, birinchi marta 1 doza aerozolni og‘iz bo‘shlig‘iga purkash mumkin.
Agar ikkinchi ingalyatsiya talab qilinsa 2-4 xarakatlarni takrorlang.
5.Ishlatgandan keyin himoya qalpoqchani kiygizish kerak.
BEROTEK N ni aerozol ko‘rinishidagi kortikosteroidlar, tuzli eritmalar va kromoglitsil kislotasining dinatriyli tuzi bilan davolashga tayyorlash (“o‘pkani ochish”) va samarani bir maromda saqlab turish uchun oldindan qo‘llash kerak.
Davolash davomiyligi kasallikning turi, og‘irligi va kechishiga bog‘liq va shifokor tomonidan har bir holatda shaxsiy ravishda buyuriladi.
Preparatni noto‘g‘ri qo‘llashdan saqlanish uchun, patsiyentni ingalyatorni to‘g‘ri ishlatishga o‘rgatish kerak. Bolalar bu dori vositasini faqat kattalarning kuzatuvi ostida va shifokorning ko‘rsatmasi bo‘yicha qo‘llashlari kerak.
Agar balloncha 3 kundan ortiq ishlatilmagan bo‘lsa, navbatdagi qo‘llash oldidan ballonchaning tubiga bir marta bosish kerak.
Balloncha tiniq emas, shuning uchun qachon u bo‘shashini ko‘rish mumkin emas. Balloncha 200 ingalyatsiyaga mo‘ljallangan. Hatto barcha dozalar ishlatilganidan keyin ham, ballonchada ozgina suyuqlik bo‘lishi mumkin. Lekin, ingalyator almashtirilishi kerak, chunki bunday vaziyatda Siz nafas olishda preparatning kerakli miqdorini olmasligingiz mumkin.
Ballonchada qolgan preparatning taxminiy miqdorini quyidagi tarzda tekshirish mumkin balloncha mundshtukdan chiqarib olinadi va uni suvli idishga joylashtiriladi. Preparatning miqdori ballonchani suvda qanday joylashishiga qarab aniqlanadi.
(3-rasm).
Mundshtukni kamida haftada bir marta tozalash kerak.
Mundshtukni, unda dori vositasi to‘planmasligi va aerozolni bloklamasligi uchun u toza bo‘lishi juda muhimdir.
Tozalash uchun oldin himoya qalpoqchani yechib olish, mundshtukni ballonchadan ajratish va mundshtukni iliq suv bilan dori vositasi va/yoki ifloslarni ko‘rinarli qoldiqlari qolmaguncha yuvish kerak.
(4-rasm).
Tozalangandan keyin silkitib, mundshtukdan suvni tushiring va uni isituvchi moslamalarni ishlatmasdan quriting. Quritilgandan keyin mundshtuk ballonchaga kiritiladi va himoya qalpoqsi kiygiziladi.
(5-rasm).
Mundshtuk BEROTEK N ni ishlatish uchun maxsus ishlab chiqarilgan. Mundshtukni boshqa aerozollar bilan ishlatmang. BEROTEK N ni faqat komplektga kiruvchi mundshtuk bilan qo‘llang.
Bosim ostida bo‘lgan ballonchani, kuch ishlatib ochish mumkin emas.
Nojo‘ya ta'sirlari
Barcha dorilar kabi, BEROTEK N ham nojo‘ya ta'sirlar chaqirishi mumkin. Nojo‘ya ta'sirlarning yuz berishi tez-tezligi quyida ko‘rsatilgan juda tez-tez (≥1/10); tez-tez (≥1/100 dan <1/10 gacha); tez-tez emas (≥1/1000 dan <1/100 gacha); kam hollarda (≥1/10000 dan <1/1000 gacha); juda kam hollarda (<1/10000); noma'lum (mavjudma'lumotlar bo‘yicha baholash mumkin emas).
Immun tizimi tomonidan buzilishlar
Noma'lum yuqori sezuvchanlik reaktsiyalari (masalan, qichishish, toshma, purpura, trombotsitopeniya, yuz shishishi).
Moddalar almashinuvi va oziqlanish tomonidan buzilishlar
Tez-tez emas gipokaliyemiya; kam xollarda giperglikemiya.
Yaqqol gipokaliyemiyani rivojlanish xavfi og‘ir bronxial astmasi bo‘lgan patsiyentlarda ksantin hosilalari (masalan, teofillin), kortikosteroidlar va/yoki diuretiklar bilan bir vaqtda qabul qilinganda oshadi. Bundan tashqari, gipoksiya gipokaliyemiyaning aritmogen ta'sirini kuchaytirishi mumkin. Bunday hollarda qon zardobida kaliyning darajasini nazoratini o‘tkazish kerak.
Shuningdek qonda insulin, erkin yog‘ kislotalari, glitserol va keton tanachalarining darajasini oshishi ham kuzatiladi.
Ruhiyatni buzilishi
Tez-tez emas ruxiy o‘zgarishlar, qo‘zg‘alish; noma'lum asabiylik.
Ruxiy o‘zgarishlaryuqori qo‘zg‘aluvchanlik, xulq-atvordagi o‘ta yuqori reaktivlik, uyquni buzilishi, shuningdek gallyutsinatsiyalar ko‘rinishida namoyon bo‘ladi. Bu nojo‘ya samaralari asosan 12 yoshgacha bo‘lgan bolalarda kuzatilgan.
Nerv tizimi tomonidan buzilishlar
Tez-tez tremor, bosh aylanishi; noma'lum bosh og‘rig‘i.
Yurak tomonidan buzilishlar
Tez-tez emas aritmiya, stenokardiya, yurak qorinchalari ekstrasistoliyasi; noma'lum taxikardiya, yurakni urib ketishi, miokard ishemiyasi.
Nafas tizimi, ko‘krak qafasi va ko‘ks oralig‘i a'zolari tomonidan buzilishlar
Tez-tez yo‘tal; tez-tez emas parodoksalbronxospazm; noma'lum mahalliy ta'sirlanish.
Parodoksal bronxospazm paydo bo‘lganida preparatni yuborishni darhol to‘xtatish kerak.
Me'da-ichak yo‘llari tomonidan buzilishlar
Tez-tez ko‘ngil aynishi; tez-tez emas qusish, jig‘ildon qaynashi.
Teri va teri osti to‘qimalari tomonidan
Tez-tez terlash; tez-tez emas qichishish; noma'lum eshakemi, teri reaktsiyalari, masalan, toshma.
Skelet-mushak va biriktiruvchi to‘qima tomonidan buzilishlar
Tez-tez emas mushak spazmlari; noma'lum mushak kuchsizligi, mialgiya.
Buyrak va siydik chiqarish yo‘llari tomonidan buzilishlar
Tez-tez emas siyishni buzilishi.
Boshqalar
Tez-tez emas arterial bosimini pasayishi yoki oshishi.

Qo‘llash mumkin bo‘lmagan holatlar

• Fenoterol gidrobromidiga yoki preparatning boshqa komponentiga yuqori sezuvchanlik.
• Obstruktiv gipertrofik kardiomiopatiya.
• Taxiaritmiyalarda qo‘llash mumkin emas.
Dorilarning o‘zaro ta'siri
Boshqa beta2-adrenomimetiklar, metilksantinlar (masalan, teofillin), antixolinergik vositalar va kortikosteroidlar bir vaqtda qabul qilinganida BEROTEK N ning ta'siri kuchayishi mumkin. BEROTEK N beta2-adrenomimetiklar, metilksantinlar (masalan, teofillin) yoki tizimli ta'sirga ega bo‘lgan antizolinergik vositalar (masalan, pirenzepin saqlovchi preparatlar) bilan bir vaqtda qabul qilinganida yaqqol nojo‘ya samaralari (masalan, taxikardiya, aritmiya) paydo bo‘lishi mumin.
BEROTEK N va beta-adrenoblokatorlarni bir vaqtda qo‘llash ikkala preparatlarning ta'sirini pasayishiga olib keladi, bunda bronxial astmasi bo‘lgan patsiyentlarni beta-adrenoblokatorlarni qabul qilishi og‘ir bronxospazmni rivojlanish xavfini oshiradi.
BEROTEK N qabul qilinganda diabetga qarshi vositalarning gipoglikemik ta'siri kamayishi mumkin. Lekin, odatda, bu samara yuborishning tizimli yo‘llarini (tabletkalar yoki in'ektsiyalar/infuziyalar ko‘rinishida) ishlatish bilan BEROTEK N ning yuqori dozalari qo‘llanganida paydo bo‘ladi.
Galotan, metoksifluran yoki enfluran kabi galogen saqlovchi anestetiklar ishlatilganida, BEROTEK N olayotgan patsiyentlarda yurak ritmini jiddiy buzilishlari rivojlanishiningva arterial bosimni pasayish xavfi oshishi mumkin.
Agar galogen saqlovchi anestetiklarni ishlatish bilan anesteziyani o‘tkazish rejalashtirilgan bo‘lsa, iloji boricha narkozni boshlashdan 6 soat oldin fenoterolni qabul qilishni to‘xtatish kerak.
BEROTEK N ni monoaminooksidaza ingibitorlariyoki tritsiklik antidepressantlar bilan bir vaqtda qabul qilish, fenoterolning yurak-qon tomir tizimiga ta'sirini kuchayishiga olib kelishi mumkin.
Bu preparatni yuqori dozalarda qabul qilishda gipokaliyemiya rivojlanishi mumkinligi tufayli, elektrolitlar darajasini monitoringini o‘tkazish kerak. Bu shuningdek diuretiklar va yurak glikozidlarini bir vaqtda qabul qilishga ham taalluqlidir.

Maxsus ko‘rsatmalar

BEROTEK N ni faqat ko‘rsatmalar bo‘yichava og‘ir yurak kasalliklarida, ayniqsa yaqinda o‘tkazilgan miokard infarktida va yurak ishemik kasalligida, yurak glikozidlarini qabul qilishda, og‘ir va nazorat qilinmaydigan arterial gipertenziyada, anevrizmada,gipertireozda, dekompensatsiyalangan qandli diabetda, feoxromatsitomada ehtiyotkorlik bilan qo‘llash kerak.
Beta2-agonistlar bilan davolash potentsial og‘ir gipokaliyemiyani rivojlanishiga sabab bo‘lishi mumkin. Beta2-agonistlar bilan induktsiyalangan gipokaliyemiya ksantin hosilalari yoki glyukokortikoidlar yoki diuretiklar bir vaqtdaqo‘llanishi natijasida kuchayishi mumkin. Og‘ir bronxial astmasi bo‘lgan patsiyentlarda buni ayniqsa hisobga olish kerak. Bundan tashqari, gipokaliyemiyaning aritmogen samaralarini gipoksiya kuchaytirishi mumkin. Gipokaliyemiya digoksinning aritmogen potentsialini oshishini chaqirishi mumkin. Qon zardobida kaliyning darajasini monitoringini o‘tkazish tavsiya etiladi.
Simpatomimetik vositalarni, shu jumladan BEROTEK N ham qo‘llaganda, yurak-qon tomir tizimi tomonidan samaralar paydo bo‘lishi mumkin. Chop etilgan adabiyotlarda va postmarketing qo‘llashma'lumotlarida, beta-agonistlarni qo‘llash bilan bog‘liq bo‘lgan miokard ishemiyasi rivojlanishini kam hollari ta'riflangan. BEROTEK N ni qabul qilayotgan yurakning og‘ir surunkali kasalliklari (masalan, yurak ishemik kasalligi, aritmiyasi yoki yaqqol yurak yetishmovchiligi) bo‘lgan patsiyentlar, ko‘krak qafasida og‘riq sindromi yoki yurak kasalligini zo‘rayishining boshqa simptomlari paydo bo‘lganda shifokor bilan maslahatlashishlari kerakligi haqida ogohlantirilgan bo‘lishlari kerak. Hansirash va ko‘krak qafasida og‘riq kabi simptomlarga alohida e'tibor berish kerak, chunki ular respirator ham, kardial etiologiyali ham bo‘lishlari mumkin.
Yuqori dozalarda qabul qilinganida qonda glyukozaning darajasini oshishi mumkinligi tufayli, qandli diabeti bo‘lgan patsiyentlarda qondagi glyukozaning darajasini muntazam nazorat qilish kerak.
Buyrak va jigar yetishmovchiligida fenoterolning farmakokinetikasi bo‘yicha ma'lumotlar yo‘qligi tufayli, bu preparatni bunday patsiyentlarga buyurishda ehtiyotkorlikka rioya qilish kerak.
99% li etanol saqlaydi (spirt; 1 dozada 100 mg dan kam).
BEROTEK N ni qo‘llash doping-nazoratni ijobiy natijalariga olib kelishi mumkin.
Homiladorlik va laktatsiya
Fenoterol yo‘ldosh to‘sig‘i orqali o‘tadi.
Hayvonlarda o‘tkazilgan tadqiqotlarda embrionga salbiy ta'siri aniqlanmaganligiga qaramay, homiladorlikda fenoterolni ingalyatsion tarzda, ayniqsa homiladorlikning birinchi uch oyi davomida va emizish davrida faqat xavf va foyda nisbati sinchiklab baholanganidan keyingina qo‘llash mumkin.
Yangi tug‘ilgan chaqaloqlarga fenoterolni noxush ta'sir ko‘rsatishi noma'lum. Fenoterol ko‘krak sutiga o‘tishi tufayli, emizish davrida preparatni faqat xavf va foyda nisbati sinchiklab baholanganidan keyingina qo‘llash tavsiya etiladi.
Ingalyatsion usulda yuborilganida preparatning tokolitik ta'sir ehtimoli kam, lekin butunlay istisno qilish mumkin emas.
Fenoterolni fertillikka klinik ta'siri haqida ma'lumotlar yo‘q. Fenoterol uchun o‘tkazilgan klinikagacha bo‘lgan tadqiqotlarda, fertillikka noxush ta'siri aniqlanmagan.
Avtomobilni va mexanizmlarni boshqarish qobiliyatiga ta'siri
Dori vositasini avtomobilni va mexanizmlarni boshqarish qobiliyatiga ta'sirini o‘rganish yuzasidan tadqiqotlar o‘tkazilmagan.
Lekin patsiyentlarni klinik tadqiqotlarda bosh aylanishi kabi nojo‘ya samarasi haqida xabar berilganligi to‘g‘risida xabardor qilish kerak. Shuning uchun avtomobilni va mexanizmlarni boshqarish vaqtida ehtiyotkorlikka rioya qilish kerak. Patsiyentlarda yuqorida ko‘rsatilgan nojo‘ya ta'siri paydo bo‘lganida, ular avtomobilni va mexanizmlarni boshqarish kabi potentsial xavfli faoliyat turlaridan saqlanishlari kerak.
Preparat bolalar ololmaydigan joyda saqlansin va yaroqlilik muddati o‘tgach ishlatilmasin.

Dozani oshirib yuborilishi

Simptomlari

Dozani oshirib yuborilishi

ning darajasiga qarab, beta2-adrenomimetiklar uchun tipik bo‘lgan quyidagi nojo‘ya samaralari paydo bo‘lishi mumkin yuzga qonni oqib kelishi hissi, alahsirash, bosh og‘rig‘i, taxikardiya, yurak urishini his qilish, aritmiya, xatto shokkacha bo‘lgan arterial gipotenziya, arterial bosimni oshishi, bezovtalik, ko‘krak qafasida og‘riq, qo‘zg‘alish, ekstrasistolalar va yaqqol tremor paydo bo‘lishi mumkin, ayniqsa barmoqlarda, lekin butun tanada ham paydo bo‘lishi mumkin.
Giperglikemiya rivojlanishi mumkin.
Me'da-ichak yo‘llari tomonidan yuz berishi mumkin bo‘lgan ko‘rinishlar ko‘ngil aynishi va qusishni, ayniqsa peroral doza oshirib yuborilganida o‘z ichiga oladi.
Fenoterolning dozasi oshirib yuborilganida keyinchalik gipokaliyemiya rivojlanishi bilan birga kaliyni xujayralararo bo‘shliqqa chiqarilishi kuchayishi mumkin, bu giperglikemiyaga, giperlipidemiyaga va giperketonemiyaga olib kelishi mumkin.
Fenoterolni qo‘llashga ko‘rsatmalarga muvofiq tavsiya etilganidan yuqori dozalarda qo‘llanganida metabolik atsidoz rivojlanishi xollari qayd etilgan.
Davolash
Beta-simpatomimetiklarning dozasini oshirib yuborilishini davolash, asosan simptomatikdir. Fenoterolning antidoti sifatida beta-adrenoblokatorlarni ishlatish mumkin; lekin bronxial o‘tkazuvchanlikni yomonlashish ehtimolini hisobga olish kerak, bu preparatning dozasini sinchiklab tanlashni talab qiladi. Bu shuningdek kardioselektiv beta-adrenoblokatorlarga ham taalluqlidir.
Yurak faoliyatini EKG-monitoring qilish tavsiya etiladi.

Chiqarilish shakli

10 ml dan dozalovchi klapani bo‘lgan zanglamaydigan po‘lat ballonchalarda.
Har bir balloncha qo‘llash bo‘yicha yo‘riqnomasi bilan birga karton qutiga joylanadi.

Saqlash sharoiti

Bevosita quyosh nurlaridan himoyalangan joyda, 25oS dan past haroratda saqlansin.
Yuqori harorat ta'siridan himoyalansin va muzlatilmasin.

Yaroqlilik muddati

3 yil.

Dorixonalardan berish tartibi

Shifokor retsepti bo‘yicha beriladi.

Ishlab chiqaruvchi

Beringer Ingshelxaym Farma GmbX va Ko. KG, Germaniya.
Germaniya, 55216 Ingshelxaym-na-Reyne, Bingershtrasse, 173.
Belarusiya Respublikasidagi agentligi Minsk sh., V.Xorujey ko‘ch., 22-1402.
Tel.(+375 17) 283 16 33, faks(+375 17) 283 16 40.